جاڭا جىل ءار ەلگە ءارتۇرلى ۋاقىتتا كىرەدى

استانا. قازاقپارات- ءار ەلدىڭ سالتى باسقا. اركىم جاڭا جىلدى حال- قادىرىنشە قارسى الادى. دۇنيەنىڭ ءبىر شەتىندە توي-دۋمان، جۇرت الاشاپقىن بولىپ جاتسا، كەي ەلدەر ءۇشىن بۇل كۇن - كۇنتىزبەدەگى قاراپايىم داتا.

ال ءبىزدىڭ ەلدە جاڭا جىل الدىندا قاربالاس باستالادى. ەل جاقىن-جۋىعىنا اسىرەسە كىشكەنتايلارعا سىيلىق ازىرلەيدى. مول داستارحان جايادى.

ال وزگە ەلدەر نە ىستەيدى؟ جاڭا جىلدى ساعات ءتىلى 00-00- ءدى كورسەتكەنشە كۇتەمىز. الايدا سىزدەن بۇرىن قارسى الاتىندار بار. جەر بەتىندە 24 ساعاتتىق بەلدەۋ بار ەكەنىن ەسكەرسەك، جاڭا جىل ءار ەلگە ءارتۇرلى ۋاقىتتا كىرەدى. جىل سايىن جاڭا جىلدى الەمدە ءبىرىنشى بولىپ تىنىق مۇحيتىنىڭ باتىسىندا ورنالاسقان كيريباتي ارال مەملەكەتىنىڭ تۇرعىندارى قارسى الادى.

كيريباتيدە جاڭا جىل 31 -جەلتوقساندا ءبىزدىڭ ۋاقىت بويىنشا ساعات 17:00-دە باستالادى. ال ەڭ سوڭعى بولىپ امەريكالىق ساموا ەلدى مەكەنى، ميدۋەي، نيۋە ارالدارى جانە كيريباتيدەگى لاين ارالدارى قارسى الادى. ياعني كۇن مەن ۋاقىت 2 -قاڭتاردى جانە ءتۇن ورتاسى ساعات 1- ءدى كورسەتەدى. تەك ۋاقىت ەمەس، مەزگىل جاعىنان دا ايىرماشىلىقتار بار. ماسەلەن بىزدە قىس. ال برازيليا مەن اۆستراليادا قازىر جاز. بۇل ەلدەردىڭ قىسى كەرىسىنشە ءبىزدىڭ شىلىڭگىر شىلدەمىزدە كەلەدى. سوندىقتان جەرگىلىكتى تۇرعىندار مەن تۋريستەر جاڭا جىلدى جاعاجايدا قارسى الادى.

وندا سەرفينگپەن شۇعىلدانىپ، بي بيلەپ، پيكنيكتەر ۇيىمداستىرادى. مەرەكەنى تويلاۋ جالپى 5 كۇنگە سوزىلادى. ءار ەلدىڭ سالتى باسقا، تىلەگى ءبىر جاڭا جىل قارساڭىندا جاسالاتىن قاي ءۇردىستى المايىق، ءبارى كەلەر جىل جاقسىلىققا تولى بولسىن دەگەن تىلەكتەن تۋعان. ماسەلەن جاڭا جىل كەلگەندە ۆەنگريا تۇرعىندارى قويمالارىنان مۇيىزدەرىن، سىرنايلارىن، ىسقىرعىشتارىن الىپ، بارىنشا داۋىستاپ ىسقىرادى. وسىلايشا ولار ءۇيدى جامان رۋحتاردان تازارتىپ، بەرەكە مەن قۋانىش ءۇشىن كەڭىستىكتى بوساتادى. يتاليادا ورتاعاسىرلىق داستۇرگە سايكەس، ەسكى زاتتارىن تەرەزەدەن لاقتىرادى. نانىم بويىنشا مۇنداي قۇبىلىس ساتتىلىككە جەتكىزەدى.

شوتلانديادا جەرگىلىكتى نانىم بويىنشا 1 -قاڭتاردا ءۇيدىڭ تابالدىرىعىن اتتاعان العاشقى قوناق - قارا شاشتى ادام بولسا، ول ساتتىلىك اكەلەدى. مەرەكەگە كەلگەن قوناق وزىمەن بىرگە كومىر الىپ كەلۋى ءتيىس، كەيىنىرەك ونى ساتتىلىك ءۇشىن الاۋ وشاققا لاقتىرادى.

كۇنشىعىس ەلىندە جاڭا جىلدى اۋرۋلاردان قورعانۋ جانە ساتتىلىكتىڭ سەرىگى بولۋ ءۇشىن جاڭا كيىممەن قارسى الادى. شىرشانىڭ ورنىنا كىشكەنتاي موچيبانا اعاشى قويىلادى. قاراعاي بۇتاقتارىمەن ەسىكتەردى بەزەندىرەدى. جاڭا جىلداعى تۇندە ءاربىر جاپوندىق كەمەلدەنۋ جانە نەگاتيۆتەن ارىلۋ ءۇشىن 108 قوڭىراۋ سوعىسىن ەستۋدى ارماندايدى. جاڭا جىلدى تويلامايتىن ەلدەر جاڭا جىلدى مۇلدەم تويلامايتىن نەمەسە بەلگىلى سەبەپپەن تويلاۋعا تىيىم سالىنعان ەلدەر دە بار.

قىتاي، ءۇندىستان، بانگلادەش، ۆەتنام، ساۋد ارابياسى، يزرايل، يران جاڭا جىلدى جىلدىڭ ءارتۇرلى ايىندا قارسى الادى. بۇل سول ەلدىڭ سالت- داستۇرىنە، نانىم- سەنىمىنە بايلانىستى قالىپتى ءۇردىس.

جالپى بيىلعى جىل ءبىرقاتار ەل ءۇشىن اسىرەسە تاياۋ شىعىس ەلدەرى ءۇشىن وتە اۋىر جىل بولدى. وكىنىشكە قاراي قاقتىعىستار كەلەر جىلى دا جالعاسادى دەپ بولجايدى ساراپشىلار. دەگەنمەن بيىل قاقتىعىستان زارداپ شەككەن ەلدىڭ ءبىرى ليۆان كەلەر جىلدان ءۇمىتتى. ەلدە ۋاقىتشا ءبىتىم ورناعالى بەرى تۇرعىندار دا ءۇمىت پايدا بولعان. قازىر ەل استاناسى بەيرۋتتە مەرەكەلىك كوڭىل كۇي سەزىلەدى.

24.kz