جاڭا ازاماتتىق كودەكس قابىلداۋ قاجەت - مەملەكەت باسشىسى
استانا. KAZINFORM - قۇرىلتاي دەپۋتاتتارى ۇكىمەتپەن بىرلەسە وتىرىپ، جاڭا ازاماتتىق كودەكستى ازىرلەۋگە تەز ارادا كىرىسكەنى ءجون. بۇل تۋرالى قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت توقايەۆ ءمالىم ەتتى.
- قازىرگى جاعدايدا يننوۆاتسيالاردى تابىستى ەنگىزىپ، ەكونوميكانىڭ باسەكەگە قابىلەتىن ارتتىرۋ ىسىندە قۇقىق جۇيەسى ايرىقشا ءرول اتقارادى. قولدانىستاعى ازاماتتىق كودەكس وتكەن عاسىردىڭ 90-جىلدارىندا قابىلداندى. كودەكس ءوزىنىڭ تاريحي ميسسياسىن تولىق اتقارىپ شىقتى دەسەك، ارتىق بولمايدى. بۇل قۇجات نارىقتىق ەكونوميكانىڭ نەگىزگى ينستيتۋتتارىن قۇرۋعا جول اشتى، مەنشىكتى قورعاۋ قاعيداتىن بەكىتتى. بۇعان قوسا، جاڭا تاريحي داۋىردەگى ازاماتتىق قاتىناستاردىڭ قۇقىقتىق نەگىزىن قالىپتاستىردى. دەگەنمەن قانشا جەردەن ساپالى بولسا دا، بۇل ازاماتتىق كودەكس وتپەلى كەزەڭدەگى ەكونوميكا ءۇشىن ازىرلەندى. سول كەزدە وزىق تەحنولوگيالاردىڭ زاتى تۇگىل، اتى دا جوق بولاتىن. ارينە، سوڭعى 30 جىل ىشىندە بۇكىل الەم، سونىڭ ىشىندە قوعامىمىز تۇبەگەيلى وزگەردى، - دەدى قاسىم-جومارت توقايەۆ.
پرەزيدەنتتىڭ ايتۋىنشا، وسىنىڭ ءبارىن ەسكەرە وتىرىپ، بولاشاقتىڭ ەكونوميكاسىنا بايىپپەن كوشۋگە قۇقىقتىق نەگىز بولاتىن جاڭا ازاماتتىق كودەكس قابىلداۋ قاجەت.
- بۇل كاسىپكەرلەردىڭ، ينۆەستورلاردىڭ جانە ازاماتتاردىڭ الاڭسىز جۇمىس جۇرگىزۋى ءۇشىن قۇقىقتىق تۇراقتىلىقتى قامتاماسىز ەتۋگە مۇمكىندىك بەرەدى. قۇرىلتاي دەپۋتاتتارى ۇكىمەتپەن بىرلەسە وتىرىپ، وسى ماڭىزدى قۇجاتتى ازىرلەۋگە تەز ارادا كىرىسكەنى ءجون. قۇرىلتاي جاڭا ازاماتتىق كودەكستى كەلەسى جىلدىڭ اياعىنا دەيىن قابىلداسا ءجون بولار، - دەدى مەملەكەت باسشىسى.
ايتا كەتەلىك پرەزيدەنت ميكرو جانە شاعىن بيزنەستى تەكسەرۋگە ءۇش جىلعا موراتوري ەنگىزۋ ماسەلەسىن تالقىلاۋدى ۇسىنعان ەدى.
