جاۋاپ الاتىن ادام جوق: ناتاليا گودۋنوۆا «قازسۋشاردىڭ» قارجىلىق جاعدايىنا قاتىستى

ماجىلىستە سۋ رەسۋرستارىنىڭ باسقارىلۋ تيىمدىلىگىنە جۇرگىزىلگەن اۋديتورلىق ءىس-شارالاردىڭ قورىتىندىسىن تالقىلاۋ كەزىندە جوعارى اۋديتورلىق پالاتانىڭ ءتورايىمى ناتاليا گودۋنوۆا «قازسۋشار» مەكەمەسىندە باسشى ءجيى اۋىساتىنىن سىنادى، دەپ حابارلايدى Kazinform.

«شىنىمەن دە، «قازسۋشاردىڭ» جاعدايى ستاندارتتان تىس بولىپ تۇر. تازا قارجىلىق فورمۋلالار بويىنشا ەسەپتەسەك، كومپانيانىڭ قارجىلىق ورنىقتىلىعى 98 پايىز دەپ شىعادى. سونىڭ وزىندە كاسىپورىننىڭ بۇكىل تابىسىنىڭ 48 پايىزى رەسپۋبليكالىق بيۋدجەتتەن تۇسەدى.

تەك 52 پايىزى عانا تۇتىنۋشىلارعا سۋ بەرۋدىڭ اقىسىنان كىرەدى. ياعني، مەكەمەنىڭ قارجىلىق ورنىقتىلىعى الدامشى. ويتكەنى كورسەتكىشتەر كاسىپورىن شوتىنداعى قولما- قول قارجى قالدىقتارى ەسەبىنەن تۋىنداپ وتىر. 2023 -جىلعى 1-ماۋسىمدا جۇرگىزىلگەن اۋديت ساتىندە شوتتا قالعان قولما- قول قارجى 18,9 ميلليارد تەڭگە نەمەسە بۇكىل اقشالاي قارجىنىڭ 57 پايىزى بولعان. بۇل قاراجات 2018 -جىلدان بەرى جيناقتالىپ وتىرعان»، - دەدى جوعارى اۋديتورلىق پالاتا باسشىسى.

ونىڭ سوزىنشە، پالاتا 5 جىلدىڭ ىشىندە سۋ رەسۋرستارى سالاسىنا 3 اۋديت جۇرگىزگەن.

«سول كەزدە ۇيىمداستىرۋ ماسەلەسى بار ەكەنىن كوردىك. ءار اۋديت سايىن كىمنەن جاۋاپ الارىمىزدى بىلمەيمىز. ويتكەنى جوعارۋ اۋديتورلىق پالاتانىڭ ءار وتىرىسىنا «قازسۋشار» مەن سۋ رەسۋرستارى كوميتەتىنەن ءتۇرلى باسشى كەلىپ تۇرادى. جاۋاپ الاتىن ادام جوق. مىنە، سوندىقتان «كاسىپورىننىڭ قارجىلىق جاعدايى ورنىقسىز» دەپ قورىتىندى جاساۋعا بولادى. ۇيىمعا قارجىلىق تۇراقتىلىق جاعىنان دا، ۇيىمداستىرۋ جاعىنان دا كەشەندى شارالار قولدانۋ قاجەت. سىن-قاتەرلەرىن تارقاتىپ ايتا الامىن. ءبىراق ول اۋديت قورىتىندىسىندا كورسەتىلگەن»، - دەدى ناتاليا گودۋنوۆا.

اۆتور

ەسىمجان ناقتىباي