حارريس ترامپتىڭ پىكىرتالاس وتكىزۋ ۇسىنىسىنان باس تارتتى
استانا. KAZINFORM - ا ق ش ۆيتسە-پرەزيدەنتى دەموكرات كامالا حارريستىڭ سايلاۋالدى شتابى رەسپۋبليكالىق پارتياسىنىڭ بۇرىنعى كوشباسشى دونالد ترامپتىڭ 4-قىركۇيەكتە Fox News الاڭىندا پىكىرتالاس وتكىزۋ ۇسىنىسىنان باس تارتتى. ول جونىندە شتابتىڭ جازباشا مالىمدەمەسىندە باياندالدى.
«دونالد ترامپ كەلىسىمىن بەرگەن پىكىرتالاسقا قاتىسۋدان جالتارۋعا تىرىسادى. ول ويىن ويناۋىن توقتاتىپ، بۇعان دەيىن راستاعان 10-قىركۇيەكتەگى پىكىرتالاسقا قاتىسۋى ءتيىس. ۆيتسە-پرەزيدەنت قالاي دەگەندە دە پرايم-تايم ۋاقىتىندا ۇلتتىق اۋديتوريا الدىندا ءسوز سويلەۋ مۇمكىندىگىن پايدالانۋ ءۇشىن سول جەردە بولادى. ءبىز ەكى [سايلاۋ] ناۋقاندا كەلىسكەن پىكىرتالاستاردان كەيىنگى پىكىرتالاستاردى تالقىلاۋعا قارسى ەمەسپىز»، - دەلىنگەن قۇجاتتا.
بۇعان دەيىن ترامپ Fox News تەلەارناسىمەن 4-قىركۇيەكتە حارريسپەن تەلەديدارلىق پىكىرتالاس وتكىزۋگە كەلىسكەنىن ايتقان بولاتىن. ەكس-پرەزيدەنتتىڭ ايتۋىنشا، 10-قىركۇيەكتە ABC تەلەارناسىندا وتكەن پىكىرتالاس كەلىسىمى ەندى وزەكتى ەمەس. ويتكەنى قازىرگى مەملەكەت باسشىسى دجو بايدەن قاتاردان شىقتى. سونىمەن قاتار رەسپۋبليكالىق حارريسپەن بولاتىن پىكىرتالاسقا كورەرمەندەردىڭ قاتىسۋىن قالايدى. بايدەن شتابى بۇعان ءۇزىلدى-كەسىلدى قارسى بولدى جانە ماۋسىم ايىندا مەملەكەتتىك جوعارى لاۋازىمعا ەكى ۇمىتكەردىڭ پىكىرتالاسى تەك جۇرگىزۋشىلەردىڭ قاتىسۋىمەن ءوتتى.
Fox News تەلەارناسى 17-قىركۇيەكتە پىكىرتالاس ۇيىمداستىرۋدى ۇسىنىپ وتىر. ءتىپتى، ترامپ پەن حارريس شتابتارىنا شاقىرۋ جىبەردى. ترامپ ءوز كەزەگىندە حارريسپەن ءبىر ەمەس، بىرنەشە رەت پىكىرتالاس وتكىزگىسى كەلەتىنىن مالىمدەدى.
اۆتور
مارلان جيەمباي
