«حاندار شەجىرەسى» قولجازباسى يۋنەسكو- نىڭ حالىقارالىق «الەم جادى» تىزىمىنە ەنگىزىلدى
استانا. KAZINFORM - بۇل تۋرالى ءوزىنىڭ Telegram ارناسىندا مەملەكەتتىك كەڭەسشى ەرلان قارين ءمالىم ەتتى.
- پرەزيدەنت قاسىم-جومارت توقايەۆ ۇلتتىق قۇرىلتايدىڭ ءتورتىنشى وتىرىسىندا ەلىمىزدىڭ دەرەكتى مۇرالارىن ساقتاۋ باعىتىنداعى جۇمىستى جانداندىرۋعا قاتىستى ناقتى تاپسىرما بەرگەن بولاتىن. «حاندار شەجىرەسى» قولجازباسى - XVIII عاسىردا جازىلعان، ۇزىندىعى 3 مەتردەن اساتىن بۇكتەمە قاعاز تۇرىندەگى قۇجات، - دەيدى مەملەكەتتىك كەڭەسشى.
ونىڭ سوزىنشە، يۋنەسكو مويىنداعان بۇل بىرەگەي ارتەفاكت قازاق ەلىن باسقارعان حانداردىڭ شەجىرەسى باي ەكەنىن اڭعارتادى. سونىمەن قاتار 16-18- عاسىرلاردا ءومىر سۇرگەن تاريحي تۇلعالاردىڭ شىعۋ تەگىن جانە ولاردىڭ وزگە حالىقتارمەن قالاي بايلانىس ورناتقانىن تۇسىنۋگە مۇمكىندىك بەرەدى.
بۇعان دەيىن يۋنەسكو تىزىمىنە قوجا احمەت ياسساۋيدىڭ قولجازبالارى، «نيەۆادا- سەمەي» حالىقارالىق انتيادرولىق قوزعالىسى تۋرالى مۇراعات ماتەريالدارى، سونداي-اق ارال تەڭىزىنىڭ مۇراعات قورى ەنگىزىلگەن بولاتىن.
وسىعان دەيىن كەسكەن-كۇيىك قالاشىعى يۋنەسكو بۇكىلالەمدىك مۇرا تىزىمىنە ەنگىزىلۋى مۇمكىن ەكەنى تۋرالى جازدىق.
