حان ورداسى، سارايشىق، جوشى حان كەسەنەسى تۋريستەرگە قولجەتىمدى بولا ءتۇستى

استانا. KAZINFORM - بيىل بىرنەشە تاريحي نىسان تۋريستەر ءۇشىن قولجەتىمدى بولادى. بۇل تۋرالى تۋريزم جانە سپورت ءمينيسترى ەرمەك مارجىقپايەۆ ءمالىم ەتتى.

«ماڭىزدى جوبالاردىڭ ىشىندە جاعاجايلارداعى تۋريستىك وبەكتىلەردى سۋمەن قامتاماسىز ەتۋ ماسەلەسىن شەشۋگە باعىتتالعان «كاسپي» تۇشىلاندىرۋ زاۋىتىنىڭ قۋاتتىلىعىن ارتتىرۋ جوباسىن اتاپ وتكىم كەلەدى. سونىمەن قاتار باتىس قازاقستان وبلىسىنداعى حان ورداسى، اتىراۋ قالاسىنداعى سارايشىق قالاشىعىنا جانە ۇلىتاۋ وبلىسىنداعى جوشى حان كەسەنەسىنە دەيىنگى جولداردا قۇرىلىس جۇمىستارى جۇرگىزىلدى. بۇل - مادەني- تۋريستىك نىسانداردىڭ قولجەتىمدىلىگىن ايتارلىقتاي ارتتىرادى»، - دەدى ەرمەك مارجىقپايەۆ ۆەدومستۆونىڭ كەڭەيتىلگەن القا وتىرىسىندا.

ونىڭ ايتۋىنشا، بىلتىر ينجەنەرلىك ينفراقۇرىلىمدى دامىتۋعا جالپى قۇنى 31 ميلليارد تەڭگەگە 33 جوبا ىسكە اسىرىلدى. بيىل 289 ميلليارد تەڭگەگە 70 جوبا جۇزەگە اسىرىلماق.

اۆتور

داۋلەت ىزتىلەۋ