حاماس ترامپ اكىمشىلىگىمەن كەلىسسوزگە دايىن

استانا. KAZINFORM - پالەستينالىق حاماس اسكەريلەندىرىلگەن توبى ا ق ش پرەزيدەنتى دونالد ترامپ اكىمشىلىگىمەن بايلانىس ورناتىپ، كەلىسسوز جۇرگىزۋگە دايىن ەكەنىن ءبىلدىردى.

بۇل جايىندا حاماس ساياسي بيۋروسىنىڭ جوعارى لاۋازىمدى مۇشەسى مۋسا ابۋ مارزۋك ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

- ءبىز ترامپ اكىمشىلىگىمەن بايلانىسقا جانە كەلىسسوزدەرگە دايىنبىز. بۇعان دەيىن دە بايدەن، ترامپ نەمەسە ا ق ش اكىمشىلىگىنىڭ وزگە قاي-قايسىسىمەن دە بايلانىس ورناتۋعا قارسىلىق بىلدىرمەدىك. بارلىق حالىقارالىق تاراپپەن كەلىسسوزدەرگە اشىقپىز، - دەدى ابۋ مارزۋك.

مارزۋكتىڭ مالىمدەۋىنشە، ا ق ش-پەن كەلىسسوز حاماس ءۇشىن قاجەتتىلىك بولىپ تۇر دەۋگە تۇرارلىق. ويتكەنى، ۆاشينگتون تاياۋ شىعىستاعى نەگىزگى ويىنشى سانالادى.

- مىنە، سوندىقتان دا ءبىز امەريكالىقتارمەن كەلىسسوزدەرگە قولداۋ بىلدىردىك جانە بۇل ماسەلەگە قارسىلىق تانىتپايمىز، - دەپ قوستى ابۋ مارزۋك.

سەيسەنبى كۇنى حاماس دەلەگاتسياسى ماسكەۋدە بولىپ، ر ف س ءى م باسشىلىعىمەن كەزدەسۋ وتكىزدى.

كۇنى كەشە ترامپ پالەستينالىقتار گازاا سەكتورىنان باسقا جەرگە قونىس اۋدارعاننان كەيىن سوعىستان قيراعان اۋماقتى ا ق ش باقىلاۋىنا الاتىنىن جانە ونى ەكونوميكالىق تۇرعىدا دامىتۋمەن اينالىساتىنىن ايتىپ، ۋادە بەرگەن ەدى. امەريكا پرەزيدەنتىنىڭ بۇل ءسوزى قازىردىڭ وزىندە تاياۋ شىعىس وڭىرىندە، سونىمەن قاتار كەيبىر امەريكالىق ساياساتكەرلەر اراسىندا سىنعا ۇشىراپ وتىر.

حاماس- تىڭ رەسمي وكىلى سامي ابۋ زۋحري ا ق ش پرەزيدەنتى دونالد ترامپتىڭ گازا سەكتورىن باسىپ الۋ تۋرالى مالىمدەمەسى «كۇلكىلى» ءارى «ابسۋرد» ەكەنىن مالىمدەدى.

- ترامپتىڭ گازانى باقىلاۋعا الۋ نيەتى تۋرالى مالىمدەمەسى كۇلكى تۋدىرادى ءارى اقىلعا سىيمايدى. مۇنداي سيپاتتاعى كەز كەلگەن يدەيا وڭىردەگى جاۋلىق وتىن تۇتاندىرۋعا تۇرتكى بولا الادى، - دەپ مالىمدەدى ابۋ زۋحري Reuters اگەنتتىگىنە.

حاماس قوزعالىسى ساياسي بيۋروسىنىڭ مۇشەسى يززات ال-ريشك گازا قانداي دا ءبىر تاراپ ونىڭ تاعدىرىن شەشە الاتىنداي ورتاق ايماق ەمەس، بۇل پالەستينا جەرىنىڭ باسىپ الىنعان اجىراماس بولىگى ەكەنىن تىلگە تيەك ەتتى.

ساۋد ارابياسىنىڭ سىرتقى ىستەر مينيسترلىگى پالەستينالىقتاردى ءوز جەرىنەن قۋدالاۋعا باعىتتالعان كەز كەلگەن ارەكەتتى قابىل المايتىندىقتارىن مالىمدەدى. سونىمەن قاتار استاناسى شىعىس يەرۋساليم بولاتىن تاۋەلسىز پالەستينا مەملەكەتى قۇرىلماي يزرايلمەن ديپلوماتيالىق قارىم-قاتىناس ورناتپايتىندىقتارىن اشىق ايتتى.

بۇعان دەيىن گازاداعى اتىستى توقتاتۋ كەلىسىمىنىڭ ەكىنشى كەزەڭى باستالعانىن جازعان ەدىك.

اۆتور

مارلان جيەمباي