حاماس گۋمانيتارلىق ءۇزىلىس تۋرالى يزرايل ۇسىنىسىنان باس تارتتى
حاماس ۇيىمى سوعىستى ءبىر اپتاعا توقتاتىپ، ونىڭ وتەۋى رەتىندە 40 ادامدى تۇتقىننان بوساتۋ تۋرالى يزرايل ۇسىنىسىنان باس تارتتى.
Kazinform بۇل تۋرالى Wall Street Journal-عا سىلتەمە جاساپ حابارلايدى.
باسىلىمنىڭ جازۋىنشا، اسكەريلەردىڭ قولباسشىلىعى سوعىستى توقتاتۋ تۋرالى كەلىسىم كۇشىنە ەنبەيىنشە، يزرايلدىك تۇتقىنداردى قايتارۋ ماسەلەسىن تالقىلاۋدان ءۇزىلدى-كەسىلدى باس تارتىپ وتىر.
حاماس- تىڭ شەشىمىن اتالعان توپتىڭ ساياسي قاناتىنىڭ جەتەكشىسى يسمايل حانيا ەگيپەتتىك بارلاۋشىلارمەن كەزدەسۋدە ايتقان. ول كايرعا وق اتۋدى توقتاتۋ جانە گازا سەكتورىنا جەتكىزىلەتىن گۋمانيتارلىق كومەك كولەمىن ارتتىرۋدى كەلىسۋگە كەلگەنىن اتاپ وتكەن.
ەسكە سالايىق، 19-جەلتوقساندا 80 ەلدىڭ ەلشىلەرى مەن ديپلوماتتارى الدىندا ءسوز سويلەگەن يزرايل پرەزيدەنتى يتسحاك گەرتسوگ ءوز ەلى جاڭا بىتىمگەرلىك ءۇزىلىس پەن گازا سەكتورىنا قوسىمشا گۋمانيتارلىق كومەك جەتكىزۋ ءۇشىن حاماس قوزعالىسىمەن كەلىسسوزگە اشىق ەكەنىن مالىمدەگەن بولاتىن.
يزرايل- پالەستينا شيەلەنىسى
بيىلعى 7 -قازاندا پالەستينالىق حاماس ۇيىمى يزرايلگە قارسى وپەراتسيا باستادى. گازا سەكتورىنان يزرايلگە قاراي مىڭداعان راكەتا ۇشىرىلدى، قارۋلانعان توپتار يزرالدىك ەلدى مەكەندەرگە باسىپ كىردى. حاماس بۇل وپەراتسيا شىعىس يەرۋساليمدە وككۋپاتسيالانعان ءال-اقسا مەشىتىنە جاسالعان شابۋىلعا جانە يزرايلدىكتەردىڭ پالەستينالىقتارعا قارسى ارتىپ كەلە جاتقان زورلىق-زومبىلىعىنا جاۋاپ ەكەنىن ايتتى.
ءوز كەزەگىندە يزرايل حاماس- قا قارسى جاۋاپتى وپەراتسيا باستاپ، ونىڭ سوڭى گازا سەكتورىنداعى حالىقتى جاپپاي قىرۋعا ۇلاستى. 27 -قازاندا يزرايل گازاعا قۇرلىقتاعى اسكەرىمەن سوققى جاساۋعا كوشتى.
بۇگىندە گازانىڭ 2,3 ميلليون تۇرعىنى ەكسكلاۆتىڭ تولىق قورشاۋدا قالۋىنان ازىق-تۇلىك، سۋ، ءدارى-دارمەك تاپشىلىعىنان زارداپ شەگىپ وتىر. مىڭداعان عيمارات، سونىڭ ىشىندە اۋرۋحانالار، مەشىتتەر مەن شىركەۋلەر زاقىمدالدى نەمەسە تولىعىمەن قيرادى.
حاماس پەن يزرايل اراسىندا 24-قاراشا كۇنى تاڭەرتەڭ كۇشىنە ەنگەن «گۋمانيتارلىق ۇزىلىك» 1-جەلتوقساندا تاڭەرتەڭ اياقتالدى. بۇل كۇندەرى ەكى تاراپ تۇتقىنعا الىنعان ونداعان اداممەن الماستى.
ءبىتىم تۋرالى ۋاقىتشا كەلىسىم اياقتالىسىمەن يزرايل گازاعا قارسى شابۋىلىن جالعاستىردى.
جەلتوقسان ايىنىڭ العاشقى ونكۇندىگىندەگى مالىمەت بويىنشا، يزرايلدىڭ گازاعا شابۋىلىنان 17,7 مىڭ ادام قازا تاپتى.
اۆتور
بالنۇر قوجاگەلدى
