حاماس جەتەكشىسىنىڭ ءولىمى: ءبىرقاتار ەلدىڭ باسشىلارى پىكىر ءبىلدىردى

استانا. قازاقپارات -ءبىرقاتار ەلدىڭ باسشىلارى حاماس جەتەكشىسىنىڭ ولىمىنە قاتىستى پىكىر ءبىلدىرىپ جاتىر.

ولار: «تاياۋ شىعىستاعى قاقتىعىستى قارۋمەن ەمەس، بەيبىت جولمەن شەشۋ كەرەك»، - دەپ وتىر.

ابدەل-راحيم سرۋر، ياحيا سينۆار جاقتاسى:

- سينۆار قازا تاپقانىمەن، ونىڭ ورنىن باسقا بىرەۋ باسادى. ياحيا سينۆار سەكىلدى جۇزدەگەنى بولادى.

كەشە يوردانيادا ونداعان ادام يزرايل ەلشىلىگى عيماراتى الدىنا جينالىپ، حاماس جەتەكشىسى ياحيا سينۆاردىڭ قازاسىنا بايلانىستى شەرۋ ۇيىمداستىردى. شەرۋشىلەر سينۆاردىڭ قۇرمەتىنە ۇرانداتىپ، ەل بيلىگىن يزرايلمەن اراداعى قارىم-قاتىناستى تولىعىمەن ۇزۋگە شاقىردى. ءوز كەزەگىندە باتىس ەلدەرى سينۆاردىڭ ولىمىنەن كەيىن ايماقتاعى احۋالدى رەتتەۋ ماقساتىندا اتىستى دەرەۋ توقتاتۋعا شاقىرىپ جاتىر.

دجو بايدەن، ا ق ش پرەزيدەنتى:

- الەم ءۇشىن جاقسى كۇن بولدى. مەن بينيامين نەتانياحۋعا قوڭىراۋ شالىپ، قۇتتىقتاۋىمدى ايتتىم. سەبەبى سينۆاردىڭ قولى قانعا باتقان ادام ەدى. سوندىقتان يزرايلدىڭ بۇل ارەكەتىنە كوڭىلىم تولعانىن جەتكىزىپ، ارى قاراي گازاداعى اتىستى توقتاتۋعا بەت الۋ كەرەگىن ايتتىم. سوعىستى اياقتايتىن، تۇتقىنداردى ۇيلەرىنە قايتاراتىن ۋاقىت كەلدى. سول ءۇشىن دە بلينكەندى يزرايلگە جىبەرمەكپىن.

ولاف شولتس، گەرمانيا كانسلەرى:

- حاماس قۇرامىنا كىرمەيتىن بەيبىت تۇرعىندار اراسىندا قازا تاپقاندار مەن جاراقات العاندار سانىنا كوز جۇگىرتەتىن بولساق، ا ق ش- پەن بىرگە اتىستى توقتاتىپ، تۇتقىنداردى بوساتۋعا كۇش سالىپ جاتقانىمىزدى ءبارى تۇسىنەدى. بۇل جاعدايدى رەتتەۋدەگى ەڭ ءتيىمدى جول بولدى.

ەممانيۋەل ماكرون، فرانسيا پرەزيدەنتى:

- ياحيا سينۆاردىڭ ءولىمى - يزرايل ءۇشىن اسكەري جەتىستىك. ەندى تۇتقىنداردى بوساتىپ، سوعىستى توقتاتۋ ءۇشىن وسى ءساتتى ءتيىمدى پايدالانۋ كەرەك. اسكەري وپەراتسيالاردى دوعارىپ، گازاداعى اتىستى توقتاتۋ تۋرالى شەشىم قابىلداۋ قاجەت. وسىلايشا، يزرايلدىكتەردىڭ دە، پالەستينالىقتاردىڭ دا دامۋىنا جول اشىلادى. قازىر ءبىز وسى باعىتتا يزرايلدىك، امەريكالىق جانە اراب ارىپتەستەرىمىزبەن بىرگە جۇمىس ىستەپ جاتىرمىز. پرەمەر-مينيستر نەتانياحۋ يزرايلدىڭ قاۋىپسىزدىگى جايلى قام جەپ جۇرگەندەردىڭ بارىنە قۇلاق اسۋى ءتيىس.

ەۋرو وداقتىڭ سىرتقى ساياسات قىزمەتىنىڭ باسشىسى جوزەپ بوررەل حاماس جەتەكشىسى ياحيا سينۆاردىڭ قازا بولعانىنا قاتىستى پىكىر ءبىلدىردى. بۇل تۋرالى ول ءوزىنىڭ X الەۋمەتتىك جەلىسىندە پاراقشاسىندا جازدى. ساياساتكەردىڭ ايتۋىنشا، سينۆار تاياۋ شىعىستاعى اتىستى توقتاتۋعا كەدەرگى بولىپ كەلگەن. سونداي-اق ول ەۋرو وداقتىڭ تەرروريستەر تىزىمىندە تۇرعان ەدى.

يزرايل قورعانىس ارمياسى گازا سەكتورىندا پالەستينالىق حاماس قوزعالىسىنىڭ باسشىسى ياحيا سينۆاردىڭ كوزى جويىلعانىن رەسمي تۇردە راستاعان ەدى.

ليۆاندىق باسىلىم تاراتقان اقپار بويىنشا حاماس قوزعالىسى جۋىردا قازا تاپقان ياحيا سينۆاردىڭ ورنىنا حالەد ماشالدى ۇيىمنىڭ ساياسي بيۋروسى باسشىسى ەتىپ بەكىتكەن. قازىر ول تۇتقىنداردى بوساتۋ ماسەلەسى بويىنشا كەلىسسوزدەرگە قاتىسۋشى تاراپتارمەن بايلانىس ورناتۋ ىسىنە جاۋاپتى. بۇعان دەيىن حالەد پالەستينالىق قوزعالىستىڭ شەتەلدىك وكىلدىگىن باسقارعان ەدى.

24.kz