حالىقتىق قۇرىلىس - كەلەشەك ۇرپاقتىڭ قامى ءۇشىن قولعا العان جالپىۇلتتىق مىندەت
استانا. KAZINFORM - «حالىقتىق قۇرىلىس» بارلىق ازاماتتى جاسامپاز ىسكە جۇدىرىقتاي جۇمىلدىرادى. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲفورۋمىندا مەملەكەت باسشىسى قاسىم-جومارت توقايەۆ ايتتى.
- «حالىقتىق قۇرىلىس» دەگەن اتاۋىندا تۇرعانداي، بۇل جوبا حالىقتىڭ يگىلىگىن كوزدەيدى، بارلىق ازاماتتى جاسامپاز ىسكە جۇدىرىقتاي جۇمىلدىرادى. بۇل - شىن مانىندە كەلەشەك ۇرپاقتىڭ قامى ءۇشىن قولعا العان جالپىۇلتتىق مىندەت. قۇبىلمالى ءارى تۇراقسىز الەمنىڭ كۇردەلى سىن- قاتەرلەرىنە ءبىزدىڭ لايىقتى جاۋابىمىز - «قۇرىلىس جانە تاعى دا قۇرىلىس!»، - دەدى مەملەكەت باسشىسى.
پرەزيدەنت گەوساياسي جانە ەكونوميكالىق احۋال بۇلىڭعىر جاعدايدا مەملەكەتىمىزدىڭ، ەل ازاماتتارىنىڭ قاۋىپسىزدىگىن قامتاماسىز ەتۋدىڭ اناعۇرلىم دۇرىس، قيسىندى جولى وسى ەكەنىنە سەنىمدى ەكەنىن باستا ايتتى.
- وسى مازمۇنى تەرەڭ باعدارلاما اياسىندا اۋىل-ايماقتارعا، شارۋالار مەن اگروونەركاسىپ كەشەندەرىنە قاجەتتى ينفراقۇرىلىم سالىنادى. جالپى، سوڭعى جەتى جىلدا اۋىل شارۋاشىلىعى سالاسىندا جەمىستى ناتيجەلەرگە قول جەتكىزدىك. ازىق-تۇلىك ءوندىرىسى 28 پايىزعا ءوستى. جالپى قۇنى 2,7 تريلليون تەڭگە بولاتىن 1630 ينۆەستيتسيالىق جوبا ىسكە قوسىلدى. اگروونەركاسىپ ونىمدەرى ەكسپورتىنىڭ كولەمى ەكى ەسە ۇلعايىپ، 7 ميلليارد دوللارعا جۋىقتادى. سونىڭ ىشىندە وڭدەلگەن ءونىم ۇلەسى 52 پايىزعا جەتتى، - دەدى قاسىم-جومارت توقايەۆ.
مەملەكەت باسشىسى بىلتىر ەلىمىزدە سوڭعى جيىرما جىلدىڭ ىشىندە العاش رەت اۋىل شارۋاشىلىعىنا قاتىستى ۇلتتىق ساناق جۇرگىزىلگەنىنە توقتالدى.
- ساناق كەزىندە تسيفرلىق تەحنولوگيالار قولدانىلدى. ناتيجەسىندە اۋىل شارۋاشىلىعىنىڭ جاي- كۇيى تۋرالى جان-جاقتى ءارى ناقتى مالىمەت الىندى. وسى سالانىڭ شىنايى احۋالىن كورسەتەتىن تولىققاندى دەرەكتەر جينالدى. جالپى، ەلىمىزدىڭ اۋىل شارۋاشىلىعىنداعى الەۋەتى زور. باستى مىندەت - قولدا بار مۇمكىندىكتى ءتيىمدى پايدالانىپ، ۋاقىتتى سوزباي، بەلسەندى تۇردە جۇمىسقا كىرىسۋ كەرەك، - دەدى پرەزيدەنت.