حالىقارالىق فۋتبول فەدەراتسياسى فۋتبولدى دامىتۋعا 6,35 ميلليارد دوللار ءبولۋدى جوسپارلاپ وتىر
استانا. kazinform - حالىقارالىق فۋتبول فەدەراتسياسى (FIFA) فۋتبولدى دامىتۋعا بولىنەتىن قارجىنى ارتتىرىپ، الداعى ءتورت جىلدىق كەزەڭدە ۇلتتىق قاۋىمداستىقتاردىڭ ءارقايسىسىنا 25 ميلليون دوللاردان بەرۋدى كوزدەپ وتىر. باعدارلامانىڭ جالپى بيۋدجەتى 6,35 ميلليارد دوللارعا جەتۋى مۇمكىن، دەپ حابارلايدى AP.
ۇسىنىسقا سايكەس، FIFA- عا مۇشە 211 ۇلتتىق قاۋىمداستىقتىڭ ءارقايسىسىنا 4 جىل ىشىندە بولىنەتىن قارجى كولەمى باستاپقى جوسپارداعى 10 ميلليون دوللاردان 25 ميلليون دوللارعا دەيىن ۇلعايادى.
FIFA پرەزيدەنتى دجانني ينفانتينو التى قۇرلىقتىق فۋتبول كونفەدەراتسياسىنىڭ باسشىلارىنا حات جولداعان. ۇيىمنىڭ كەڭەسى باعدارلامانىڭ تۇپكىلىكتى نۇسقاسىن جەلتوقسان ايىندا ازىرلەۋدى جوسپارلاپ وتىر. ال ونى ناۋرىزدا وتەتىن FIFA كونگرەسىندە بەكىتۋى مۇمكىن.
فەدەراتسيا الەم چەمپيوناتىنان تۇسەتىن تابىستىڭ ءبىر بولىگىن ۇلتتىق قاۋىمداستىقتار مەن قۇرلىقتىق كونفەدەراتسيالاردا فۋتبولدى دامىتۋعا باعىتتاماق. قارجىنىڭ 3,5 ميلليارد دوللاردان استامىن FIFA رەزەرۆىنەن ءبولۋ كوزدەلگەن. بۇل قور 2026 -جىلعى الەم چەمپيوناتىندا 48 ۇلتتىق قۇراما باق سىنايتىنىنا بايلانىستى كۇتىلىپ وتىرعان قارجىلىق تابىستىڭ ارقاسىندا ۇلعايعان.
FIFA- نىڭ بولجامىنشا، 2022- 2026 -جىلداردى قامتيتىن ءتورت جىلدىق كەزەڭدەگى جالپى تابىس شامامەن 15 ميلليارد دوللارعا جەتەدى. بۇل كەزەڭگە ا ق ش، كانادا جانە مەكسيكادا وتەتىن الەم چەمپيوناتى دا كىرەدى. تابىس كولەمى ۇيىمنىڭ بۇرىنعى بولجامدارىنان ەداۋىر جوعارى.
ازىرگە ۇسىنىس رەسمي تۇردە بەكىتىلگەن جوق. قارجىنىڭ ناقتى كولەمى مەن ونى ءبولۋ ءتارتىبىن ۇيىمنىڭ باسشىلىعى شەشەدى.
بۇعان دەيىن FIFA قازاقستاندا بالالار فۋتبولىن دامىتۋعا 250000 دوللار بولەتىنى تۋرالى جازعان بولاتىنبىز.
ايتا كەتەيىك، موڭعوليادا FIFA قولداۋىمەن جاڭا ستاديون سالىنباق.
