حالىقارالىق «قازاق ءتىلى» قوعامىنىڭ قۇرىلتايى ءوتتى
استانا. KAZINFORM - بۇگىن استانا قالاسىندا حالىقارالىق «قازاق ءتىلى» قوعامىنىڭ VIII قۇرىلتايى ءوتتى. وتىرىسقا مەملەكەتتىك كەڭەسشى ەرلان قارين قاتىستى. سەزگە كەلگەندەرگە قازاقستان پرەزيدەنتى قاسىم-جومارت توقايەۆتىڭ قۇتتىقتاۋ حاتىن وقىپ بەردى.
ەرلان قارين، قازاقستان رەسپۋبليكاسىنىڭ مەملەكەتتىك كەڭەسشىسى:
- قازاق ءتىلى ۇلتتىق بىرەگەيلىگىمىزدىڭ نىشانى، ەل بىرلىگىن نىعايتا تۇسەتىن باستى قۇندىلىعىمىز. ونى ءبىلىم مەن عىلىمنىڭ عانا ەمەس، بيزنەس پەن تەحنولوگيانىڭ تىلىنە اينالدىرۋ نەگىزگى مىندەتتىڭ ءبىرى. مەملەكەتتىك ءتىلدى قۇرمەتپەن، كەڭىنەن ناسيحاتتاۋ قازاقستاننىڭ ءاربىر ازاماتىنىڭ قاستەرلى پارىزى. وسى ورايدا قوعامنىڭ قىزمەتىنە بەلسەنە اتسالىسىن جۇرگەن جاناشىر جاندارعا شىنايى ريزاشىلىق بىلدىرەمىن.
مەملەكەتتىك كەڭەسشى ءوز سوزىندە ماڭىزدى جوبالار مەن ءىس-شارالاردى جۇزەگە اسىرۋ ارقىلى قازاق ءتىلىن بارىنشا ناسيحاتتاۋدىڭ جانە ونىڭ قولدانىلۋ اياسىن كەڭەيتۋدىڭ ماڭىزدىلىعىن اتاپ ءوتتى. ەرلان قارين، سونداي-اق قازىر قازاق تىلىندەگى سيفرلىق كونتەنتتەردى كوبەيتۋگە، ءبىلىم بەرۋ جۇيەسىن ادىستەمەلىك تۇرعىدان قولداۋعا جانە ІТ سالاسىنداعى جەتىستىكتەردى ءتىل ماسەلەسىن شەشۋ ءۇشىن ءتيىمدى پايدالانۋعا ەرەكشە ءمان بەرىلىپ جاتقانىن جەتكىزدى. سەزد دەلەگاتتارى حالىقارالىق «قازاق ءتىلى» قوعامىنىڭ 2023-2024-جىلدارى اتقارعان جۇمىستارىن قورىتىندىلاپ، الداعى كەزەڭنىڭ باسىم باعىتتارىن بەلگىلەدى.
راۋان كەنجەحان ۇلى، حالىقارالىق «قازاق ءتىلى» قوعامىنىڭ پرەزيدەنتى:
- حالىقارالىق «قازاق ءتىلى» قوعامىنىڭ بۇعان دەيىنگى قۇرىلتايى 2023-جىلدىڭ جازىندا ءوتتى. 2024-جىلعا جاساقتالعان ءىس- قيمىل جوسپارى تولىقتاي دەرلىك ورىندالدى. جالپى سانى قىرىققا تارتا رەسپۋبليكالىق جانە حالىقارالىق دەڭگەيدەگى شارالار ءوتتى. ءبىرقاتار اۋىز تولتىرىپ ايتارلىق اۋقىمدى جوبالار ىسكە استى.
