حالىقارالىق جۇك تاسىمالى بلانكىلەرى وتاندىق كولىك كومپانيالارى اراسىندا ءتيىمدى بولىنە مە

كولىك ۆيتسە- ءمينيسترى ءساتجان ابلاليەۆ حالىقارالىق جۇك تاسىمالىنا رۇقسات بەرەتىن بلانكىلەردى وتاندىق كولىك كومپانيالارى اراسىندا ءتيىمدى ءبولۋ ءۇشىن قانداي شارالار قابىلدانىپ جاتقانىن ايتتى، دەپ حابارلايدى Kazinform.

بۇگىن ۇكىمەت وتىرىسىندا پرەمەر- مينيستر ءاليحان سمايىلوۆ ۆيتسە- مينيستردەن: «حالىقارالىق جۇك تاسىمالىنا رۇقسات بەرەتىن بلانكىلەردى وتاندىق كولىك كومپانيالارى اراسىندا ءتيىمدى ءبولۋ ءۇشىن قانداي شارالار قابىلدانۋدا؟»، - دەپ سۇراعان ەدى.

ۆيتسە- ءمينيستردىڭ ايتۋىنشا، بۇگىندە مينيسترلىك رۇقسات قاعازدارىن بەرۋدىڭ جاڭا جۇيەسىن ەنگىزۋ بويىنشا جۇمىس ىستەپ جاتىر.

«بيىلدان باستاپ قىتاي ەلىمەن كىرۋ قۇجاتتارىن قىتايدا، شەكارادا ناقتى تاراتۋ ءتاسىلى ەنگىزىلدى. ول ءوزىنىڭ ناتيجەسىن كورسەتتى. ەگەر الدىڭعى جىلدارى ەلىمىز قىتايمەن 50 مىڭعا جۋىق رۇقسات الماسقان بولسا، بيىلدىڭ وزىندە 110 مىڭعا دەيىن ارتتى. ەندى وسى تاجىريبەنى وزبەكستانمەن شەكارادا دا ەنگىزۋ جوسپارلانىپ وتىر. باسقا ەلدەرمەن قۇجاتتاردى اۆتوماتتى تۇردە ەنگىزۋ جۇمىسى جالعاسۋدا. ونى شەكارا قىزمەتىنىڭ «بۇركىت» جۇيەسى ارقىلى ونلاين باقىلاۋ ماسەلەسى پىسىقتالۋدا. وسى شارالاردىڭ ءبارى رۇقسات قاعازداردى تاسىمالداۋشىلارعا ناقتى قاجەت بولعاندا بەرۋگە مۇمكىندىك جاسايدى جانە اشىقتىعىن قامتاماسىز ەتەدى»، - دەدى ءساتجان ابلاليەۆ.

اۆتور

مارلان جيەمباي