«حالىق تەزەك تەرىپ كەتتى»: دەپۋتات سكليارعا گاز تاپشىلىعى تۋرالى ساۋال جولدادى
استانا. KAZINFORM - تۇركىستان وبلىسىنداعى گاز تاپشىلىعىنىڭ كەسىرىنەن حالىق تەزەك تەرىپ، جىڭعىل مەن سەكسەۋىلگە بالتا سىلتەي باستاعان. ءماجىلىس دەپۋتاتى قايرات بالابيەۆ پرەمەر-ءمينيستردىڭ ءبىرىنشى ورىنباسارى رومان سكليارعا وسى ماسەلەنى كوتەرىپ، دەپۋتاتتىق ساۋال جولدادى.
«تۇركىستان وبلىسىندا تابيعي گازبەن قامتىلعان ەلدى مەكەندەر سانى 557-گە جەتىپ، قامتۋ دەڭگەيى 67,2 پايىز بولعان. دەسە دە، ءالى 300-گە جۋىق ەلدى مەكەن گازبەن قامتىلماعان. ياعني، جارتى ميلليونداي جۇرت كوگىلدىر وتىنسىز كۇنەلتىپ كەلەدى. ءۇش ايدان بەرگى گاز تاپشىلىعى «جىعىلعان ۇستىنە جۇدىرىق» بولىپ، گاز باللوندارىن ساقىرلاتىپ، جۇرتتى بەكەت جاعالاتىپ قويدى. بۇعان اۆتوكولىكتەرى تەك گازبەن جۇرەتىندەردى قوسىڭىز. ال، ءۇش ايدان بەرى نە ەنەرگەتيكا مينيسترلىگى، نە اكىمدىكتەر ماسەلەنى شەشۋگە اسىعار ەمەس. ءبىر پىسىقايلار 1000 تەڭگە بەرسە، ءبىر باك پەن باللوندى تولتىرىپ بەرىپ، 500 تەڭگە قوسىمشا تولەسە، جارتىلاي گاز قۇيىپ بەرىپ، ءوز قالتالارىن پۇلداپ جاتىر. كەي جەرلەردە 70 مىڭ تەڭگەگە تالون ساتىلۋدا. قايدا بارساڭ گاز جوق، ال بار جەردىڭ جاعدايى -جاڭاعىداي»، - دەيدى دەپۋتات.
ونىڭ ايتۋىنشا سۇيىتىلعان گازدى باللونعا قۇيىپ ساتۋدىڭ ءتارتىبى قاتاڭداتىلعاننان بەرى جاعداي ۋشىعىپ كەتكەن.
«جالپى، گاز جاعدايى ۋشىعىپ بارادى. قىس بولسا - قىر استىندا. تابيعي كوگىلدىر وتىنمەن قامتاماسىز ەتىلمەگەن اۋىل تۇرعىندارى گاز باللوندارىن كادەگە جاراتىپ ءجۇر ەدى. قازىر ول دا جوق. قالىپتاسقان جاعدايدى كىم جانە قاشان شەشەدى؟ وبلىس حالقىنىڭ 80 پايىزدان استامى اۋىلدا تۇرادى. ولار گاز باللوندارىن كۇندەلىكتى تۇرمىستا پايدالانادى. تۇتىنۋشىلارعا باللونمەن گاز جەتكىزىپ بەرەتىن مەكەمەلەر قىزمەتىن توقتاتقان. كولىگى بارلار قالاعا ساندالسا دا، گاز اكەلەدى. كولىگى جوقتار ەسەك اربامەن وتىن مەن تەزەك تەرىپ، وت جاعىپ جاتىر. ونسىز دا جولدارى جالاڭاشتانىپ، كولەڭكەلەيتىن تالى جوق وبلىستا وسىلايشا بۇتاي بەرسە، جىڭعىلدان جىڭعىل، سەكسەۋىلدەن سەكسەۋىل قالماس»، - دەدى قايرات بالابيەۆ.
ول سونىمەن قاتار تۇركىستان وبلىسىنىڭ گاز تارتىلماعان ەلدى مەكەندەرىندەگى 450 مىڭ حالىقتىڭ گازدى باللونعا قۇيىپ تاسىمالدايتىنداي ەتىپ ارنايى جابدىقتالعان كولىكتەر قىزمەتىن جانداندىرۋ قاجەت ەكەنىن ايتتى.
«قۇزىرەتتى ورگاندار وڭىرلەردەگى گاز تاپشىلىعىن شۇعىل شەشىپ، اۆتوگاز بەكەتتەرىنە تەكسەرۋ تاعايىنداسىن. تەك گازبەن جۇرەتىن كولىكتەردى گازبەن قامتاماسىز ەتۋ باعىتىندا تاپسىرمالار بەرۋىڭىزدى سۇرايمىن»، - دەدى ءماجىلىس دەپۋتاتى.
اۆتور
ەسىمجان ناقتىباي
