حالىق سانى ەڭ كوپ 3 ەل ماقتا وندىرۋدە كوش باستاپ تۇر

استانا. قازاقپارات- ماقتا ءوندىرىسى بويىنشا قىتاي كوش باستاپ تۇر. وعان الەمدىك ۇلەستىڭ 25 پايىزى تيەسىلى. ياعني جىلىنا شامامەن 6,5 ميلليون ماقتا وندىرەدى. ودان كەيىنگى ورىندا - تەحنولوگياسى ەسكىرگەن جانە ارزان جۇمىس كۇشىنە تاۋەلدى ءۇندىستان.

ۇزدىك ۇشتىكتە - ا ق ش. جىلىنا 3,8 ميلليون توننا ءونىم بەرەتىن پاكىستان ءتورتىنشى ورىندا تۇر. وزىق بەستىكتى برازيليا تۇيىندەيدى. كەيىنگى 5 ورىنعا وزبەكستان، تۇركيا، سيريا، گرەكيا مەن تۇركىمەنستان تابان تىرەگەن.

ماقتا ءوندىرىسى بويىنشا الەمدەگى ۇزدىك 10 ەل:

1-قىتاي

2-ءۇندىستان

3-ا ق ش

4-پاكىستان

5-برازيليا

6-وزبەكستان

7-تۇركيا

8-سيريا

9-گرەكيا

10-تۇرىكمەنستان

ماقتا ەكسپورتىندا وزبەكستان ۇزدىك بەستىكتە. ەكسپورت بويىنشا كورىنىس ءسال باسقاشا. ماقتانى سىرتقا شىعارۋدان ا ق ش الدا. الەمدىك ەكسپورتتىڭ 34 پايىزى وسى ەلدىڭ ەنشىسىندە. ەكىنشى جانە ءۇشىنشى ورىندا برازيليا مەن ءۇندىستان تۇر. اۆستراليا ءتورتىنشى ورىنعا جايعاسسا، الا تاقيالى اعايىندار بەسىنشى ورىندى بەرمەي تۇر.

ماقتا ەكسپورتى بويىنشا الەمدەگى ۇزدىك 5 ەل: ا ق ش، برازيليا، ءۇندىستان، اۆستراليا، وزبەكستان.

الەمدەگى ماقتانىڭ %23 قىتاي ساتىپ الادى

ماقتا وندىرۋدەن الدىنا جان سالمايتىن قىتاي يمپورت كولەمى بويىنشا دا ەڭ الدىڭعى ورىندا. ول عالامدىق ءونىمنىڭ 23 پايىزىن ساتىپ الادى. بانگلادەش تە قىتايدان قالىسپايدى. ءۇشىنشى ورىندا - ۆەتنام. تاعى 2 مۇسىلمان ەلى - يندونەزيا مەن تۇركيا دا ماقتا يمپورتىنان ۇزدىك بەستىككە كىرەدى.

ماقتا يمپورتى بويىنشا الەمدەگى ۇزدىك 5 ەل: قىتاي، بانگلادەش، ۆەتنام، يندونەزيا، تۇركيا.

ءيا، وزبەكستاندا ماقتا شارۋاشىلىعىندا ىلگەرىلەۋشىلىك بار. 9-قازننان باستاپ ەلدە ماقتانى قولمەن تەرگەن ادامعا تولەنەتىن اقى كولەمى ءوستى. اۋىل شارۋاشىلىعى مينيسترلىگى قازىر 1 كەلى ماقتا جيناعان ادام 2 جارىم مىڭ سوم الادى دەپ مالىمدەدى. بۇل شامامەن 95 تەڭگە 500 تيىن. بۇرىن 2100 سوم تولەنەتىن.

حالىقارالىق ۇيىم الەمدىك برەندتەردى تۇرىكمەنستان ماقتاسىن ساتىپ الماۋعا شاقىردى. ماقتا تەرۋگە قاتىستى ماسەلە تۇرىكمەنستاندا دا بار. ماقتا - بۇل ەلدە گازدان كەيىنگى ەكىنشى ءىرى ەكسپورت تاۋارى. بىلتىر 1 ميلليون 25 مىڭ توننا ءونىم جينالعان. ءبىراق ساراپشىلار بەينەتى مول ىسكە ادامداردىڭ قول كۇشى ءجيى پايدالانىلاتىنىن ايتادى. حالىقارالىق «ماقتا ناۋقانى» اتتى ۇيىم الەمدىك برەندتەردى تۇرىكمەنستاننىڭ ماقتاسىن ساتىپ الماۋعا ۇندەۋ تاستادى.

تۇرىكمەن ەلىندە ماقتا تەرۋ ناۋقانى تامىزدىڭ اياعىنان جەلتوقسانعا دەيىن سوزىلادى ەكەن. تۇرىكمەنستان ۇكىمەتى ون مىڭداعان شارۋا، بيۋدجەتتىك سالا، ونىڭ ىشىندە مەكتەپ پەن اۋرۋحانا قىزمەتكەرلەرى مەن باسقا ازاماتتارعا ماقتانى ماجبۇرلەپ تەگىن جيناتادى. بۇل ادام ەڭبەگىن قاناۋ. ماقتا تەرۋدەن جانە وندىرۋدەن جالتارعان شارۋالاردى «ايىپپۇل سالامىز، جەرىن تارتىپ الامىز» دەپ قورقىتادى. مۇعالىم سياقتى بيۋدجەت قىزمەتكەرلەرىن ماقتا تەرۋگە ماجبۇرلەۋ بۇرىن وزبەكستاندا دا قاتتى بەلەڭ العان ەدى. ءبىراق الەمدىك برەندتەر جاپپاي بويكوت جاريالاپ بۇل باسسىزدىققا توسقاۋىل قويا ءبىلدى. بويكوت تۇرىكمەنستان بيلىگىن ساباسىنا تۇسىرە مە، جوق پا، ونى ۋاقىت كورسەتەدى.

24.kz