حالىق سانى 10 مىڭنان اساتىن اۋىلداردى قالاعا اينالدىرۋعا بولا ما

استانا. قازاقپارات - 3 جىل بويى حالىق سانى 10 مىڭنان اساتىن اۋىلداردى قالاعا اينالدىرۋعا بولادى. بۇل تۋرالى بۇگىن ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.

وتىرىس بارىسىندا پرەمەر- مينيستر ولجاس بەكتەنوۆ مينيستردەن: «سوڭعى جىلدارى تۇرعىن سانى 50 ادامعا جەتپەيتىن اۋىلدار تاراتىلدى. ادامدار ەندى ءىرى ەلدى مەكەندەرگە كوشىپ جاتىر. ياعني، بۇل رەتتە حالىق تىعىز ورنالاسقان اۋىلداردىڭ مارتەبەسىن قايتا قاراۋ قاجەت بولادى. وسىنداي اۋىلداردىڭ سانى قانشا جانە بۇل باعىتتا قانداي جۇمىس اتقارىلىپ جاتىر؟»، - دەپ سۇراعان ەدى.

نۇرلان بايبازاروۆتىڭ ايتۋىنشا، قازىر ەلىمىزدە 10 مىڭنان استام تۇرعىنى بار 112 اۋىل بار.

«ونىڭ ىشىندە 18 ەلدى مەكەندە 30 مىڭنان اسا ادام تۇرادى. ولاردىڭ مارتەبەسىن وزگەرتۋ ءۇشىن زاڭنامادا تەتىكتەر بار. مىسالى، 3 جىل بويى حالىق سانى 10 مىڭنان اسىپ وتىرسا، وندا وبلىس ءماسليحاتىنىڭ دەڭگەيىندە اتالعان اۋىلداردىڭ مارتەبەسىن وزگەرتۋ، ياعني قالاعا اينالدىرۋ قۇقىعى بار. بۇل زاڭ 2021 -جىلدان باستاپ قولدانىسقا ەنگەن بولاتىن. قازىرگى تاڭدا وبلىس اكىمدىكتەرى ءماسليحاتتاردىڭ وتىنىمىندەرىن قاراستىرىپ جاتىر. ءبىراق ءالى ناقتى شەشىم قابىلدانباعان، جۇمىس جۇرگىزىلۋدە»، - دەدى ول.

وسى ورايدا ۇكىمەت باسشىسى بۇل مىندەت ەمەس، تۇرعىنداردىڭ قۇقىعى ەكەندىگىن ناقتىلاپ سۇرادى.

«ءيا، 3 جىل بويى حالىقتىڭ سانى 10 مىڭعا كوبەيسە، وندا قالاعا اينالدىرۋ مۇمكىندىگى بار. ءتيىستى وبلىس اكىمدىكتەرى شەشىم قابىلدايدى»، - دەپ اتاپ ءوتتى نۇرلان بايبازاروۆ.

اۆتور

مارلان جيەمباي