حالىق كەڭەسىنىڭ ءاربىر مۇشەسىنە ەرەكشە جاۋاپكەرشىلىك جۇكتەلەدى - پرەزيدەنت

قاسىم-جومارت توقايەۆ جاڭا كونسۋلتاتيۆتىك ورگان قۇرامىنا كاسىبي بىلىگى جوعارى ماماندار، ابىروي-بەدەلى زور، ناعىز وتانشىل ازاماتتار مۇشە بولعانىن اتاپ ءوتتى.

- ولاردىڭ قاتارىندا جۇرتشىلىققا بەلگىلى تاجىريبەلى تۇلعالار، مەملەكەت جانە قوعام قايراتكەرلەرى، كاسىپكەرلەر مەن كوپتەگەن بەلسەندى ازاماتتار بار. قۇرىلتايدىڭ العاشقى وتىرىسىندا ايتىپ وتكەنىمدەي، اۋقىمدى رەفورمالاردىڭ ارقاسىندا مەملەكەتتىك باسقارۋ ىسىنە جاڭا، جاسامپاز، وزىق ويلى ازاماتتاردىڭ كەلۋىنە جول اشىلدى. ەل مۇددەسى ءۇشىن ادال قىزمەت ەتۋ - زور مارتەبە ءارى قاستەرلى پارىز. وسى ورايدا، سىزدەرگە - حالىق كەڭەسىنىڭ ءاربىر مۇشەسىنە ەرەكشە جاۋاپكەرشىلىك جۇكتەلىپ وتىر. سىزدەر ەل يگىلىگى ءۇشىن تاباندى ەڭبەك ەتىپ، مەملەكەتتىگىمىزدى نىعايتۋعا زور ۇلەس قوساسىزدار دەپ سەنەمىن. ىرىستى ىنتىماعىمىزدى، قوعامدىق كەلىسىمدى كۇشەيتۋ ءۇشىن بەلسەندى تۇردە ەڭبەك ەتەسىزدەر دەپ ويلايمىن، - دەدى مەملەكەت باسشىسى.

پرەزيدەنت قازاقستان حالىق كەڭەسىنىڭ الدىندا تۇرعان مىندەتتەرگە ەرتەڭ العاشقى سەسسيانىڭ نەگىزگى وتىرىسىندا كەڭىرەك توقتالادى.

داۋىس بەرۋ قورىتىندىسى بويىنشا ەرلان قوشانوۆ قازاقستان حالىق كەڭەسىنىڭ ءتوراعاسى بولىپ سايلاندى.