حالىق كەڭەسى مۇشەلەرى قازا تاپقان اسكەريلەردىڭ وتباسىلارىنا 815 ميلليون تەڭگە بولەدى

قايىرىمدىلىق باستاماسىنا ەلىمىزدىڭ ءار وڭىرىندەگى بيزنەس وكىلدەرى قوسىلدى. قازاقستان حالىق كەڭەسى حاتشىلىعىنىڭ حابارلاۋىنشا، قاراجات قازا تاپقان اسكەري قىزمەتشىلەردىڭ وتباسىلارىنا تىكەلەي بەرىلەدى.

Allur Group ديرەكتورلار كەڭەسىنىڭ ءتوراعاسى اندرەي لاۆرەنتيەۆ پەن Integra Construction KZ باس ديرەكتورى شاحمۋرات مۋتاليپ قازا تاپقان اسكەري قىزمەتشىلەردىڭ ءاربىر وتباسىنا 25 ميلليون تەڭگەدەن جولدايدى.

- SA Construction Group باس ديرەكتورى گادجي گادجيەۆ وتباسىلارعا كومەككە 100 ميلليون تەڭگە، Karazhal Operating نەگىزىن قالاۋشى جۇمابەك جانىقۇلوۆ 50 ميلليون تەڭگە بولەدى. باقىت اتايبەكوۆ، دميتري لاكتيۋشين جانە يمامزادا شاعىرتايەۆ 10 ميلليون تەڭگەدەن بولەدى. گەننادي زەنچەنكو، اكبارجون يسمايلوۆ، الەكساندر كۋپريەنكو، سىرىم ەرتايەۆ جانە لۋگمار بۋلاروۆ 5 ميلليون تەڭگەدەن جىبەرەدى، - دەپ حابارلادى قازاقستان حالىق كەڭەسىنىڭ حاتشىلىعى.

سونىمەن قاتار باستاماعا نيكولاي ارسيۋتين، رافايل گادجيبالايەۆ، ماناس تاشىبەكوۆ، لاتيپشا اسانوۆ جانە ابدۋللا يسماتۋللايەۆ قوسىلدى. ولاردىڭ ءارقايسىسى قازا تاپقان اسكەري قىزمەتشىلەردىڭ وتباسىلارىن قولداۋعا 1 ميلليون تەڭگەدەن بولەدى.

بۇعان دەيىن قازاقستان حالىق كەڭەسىنىڭ ءتوراعاسى ەرلان قوشانوۆ اسكەري قىزمەتشىلەردىڭ تۋعان-تۋىستارى مەن جاقىندارىنا كوڭىل ايتىپ، مەملەكەت باسشىسىنىڭ تاپسىرماسىمەن ارنايى مەملەكەتتىك كوميسسيا قۇرىلىپ، بارلىق قاجەتتى كومەك ۇيىمداستىرىلعانىن اتاپ ءوتتى.

- ءبىزدىڭ اسكەري قىزمەتشىلەرىمىزدىڭ قازا بولۋى - ەڭ الدىمەن ۇلكەن ادامزات قاسىرەتى. مەملەكەت باسشىسىنىڭ وكىمىمەن 25 -قىركۇيەك جالپى ۇلتتىق ازا تۇتۋ كۇنى بولىپ جاريالاندى. قازا تاپقانداردىڭ تۋىستارى مەن جاقىندارىنا شىن جۇرەكتەن كوڭىل ايتامىن، ال زارداپ شەككەندەرگە تەزىرەك ساۋىعىپ، ۇيلەرىنە ورالۋىن تىلەيمىن، - دەدى ەرلان قوشانوۆ.

ەسكە سالايىق، 2026 -جىلعى 24 -قىركۇيەكتە كاسپيدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.

كەيىننەن كاسپيدە قازا بولعان اسكەري قىزمەتشىلەردىڭ سانى 12-گە جەتىپ، ەكەۋى ىزدەستىرىلىپ جاتقانى حابارلاندى.