ح ق و- لاردا كولىكتى تىركەۋ كەزىندە جەمقورلىق جاساۋ مۇمكىندىگى بولعان
استانا. KAZINFORM - مامانداندىرىلعان ح ق ك و قىزمەتىنە كەشەندى مونيتورينگ جۇرگىزۋ بارىسىندا كولىك قۇرالدارىن تىركەۋ جانە جۇرگىزۋشى كۋالىكتەرىن بەرۋ كەزىندە ەلەۋلى جەمقورلىق تاۋەكەلدەرى انىقتالدى، دەپ حابارلايدى سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى.
نورماتيۆتىك قۇقىقتىق اكتىلەردەگى ولقىلىقتار، اقپاراتتىق جۇيەلەردىڭ جەتىلمەگەندىگى، باسقا باعدارلامالارمەن جانە دەرەكقورلارمەن ءالسىز ينتەگراتسيا زاڭسىز ارەكەتتەردى جاساۋعا مۇمكىندىك بەردى.
اگەنتتىك ۋاكىلەتتى ورگاندارعا جەمقورلىق تاۋەكەلدەرىن جويۋ تۋرالى ۇسىنىمدار ەنگىزدى.
پروتسەستەردى اۆتوماتتاندىرۋ بويىنشا ۇسىنىستار كولىك قۇرالدارىن تىركەۋ، ەمتيحانداردى قابىلداۋ جانە جۇرگىزۋشى كۋالىكتەرىن بەرۋ ەرەجەلەرىنىڭ جاڭا رەداكسياسىندا كورىنىس تاپتى.
تىركەۋ ءىس-ارەكەتتەرى كەزىندە كولىك قۇرالدارى يەلەرىنىڭ (وكىلدەرىنىڭ) جانە تەوريالىق ەمتيحانداردى تاپسىرۋ كەزىندە جۇرگىزۋشى كۋالىگىن الۋعا ۇمىتكەرلەردىڭ جەكە باسىن مىندەتتى بيومەتريالىق سايكەستەندىرۋ ەنگىزىلدى.
اۆتوكولىكتى تىركەۋ بويىنشا جاڭا اقپاراتتىق جۇيەلەر ەنگىزىلدى، ول وتىنىمدەردى رەسىمدەۋ جانە قاراۋ كەزىندە دەرەكتەردى تۇزەتۋگە مۇمكىندىك بەرمەيدى. وزگەرىستەر ەنگىزۋ قۇقىعى تەك اكىمشىلىك پوليتسيا كوميتەتىندە.
اگەنتتىكتىڭ ۇسىنىسى بويىنشا دەنساۋلىق ساقتاۋ مينيسترلىگى اعىمداعى جىلدىڭ مامىر ايىنىڭ باسىنان باستاپ كولىك قۇرالىن باسقارۋعا رۇقسات بەرۋ تۋرالى مەديتسينالىق انىقتاما بەرۋدى ەلەكتروندىق فورماتقا اۋىستىردى. بۇل قاعاز تاسىعىشتا جالعان انىقتامالار بەرۋ مۇمكىندىگىن بولدىرمايدى.
جۇرگىزۋشى كۋالىگىن الۋ ءۇشىن تەوريالىق ەمتيحانداردى تاپسىرۋ پروتسەسىندە بەينەتىركەۋ ەنگىزىلدى. ەندى بۇل پروتسەسس قوعامدىق باقىلاۋدى قامتاماسىز ەتۋ ءۇشىن تىكەلەي ەفيردە كورسەتىلەدى.
ەمتيحانداردى قايتا تاپسىرۋ راسىمدەرى رەتتەلدى. قايتالاما ارەكەتتەردىڭ سانى - 2 رەتتەن ارتىق ەمەس، وتپەگەن جاعدايدا-3 ايدان كەيىن، تىيىم سالىنعان زاتتاردى پايدالانعان كەزدە – 6 ايدان كەيىن ەمتيحان تاپسىرا الادى.
جاڭا اقپاراتتىق تەحنولوگيالاردى ەنگىزۋدىڭ ارقاسىندا وسى سالاداعى تاۋەكەلدەردى ايتارلىقتاي ازايتۋعا مۇمكىندىك تۋدى.
الايدا، قازىرگى ۋاقىتتا جەكەلەگەن ازاماتتار، سونداي-اق مامانداندىرىلعان ح ق ك و قىزمەتكەرلەرى اقشالاي سىياقىلار ءۇشىن ماسەلەلەردى شەشۋگە تىرىسۋدا.
ماسەلەن، الماتى قالاسى بويىنشا سىبايلاس جەمقورلىققا قارسى قىزمەت «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق فيليالى №1 مامانداندىرىلعان ءبولىمى باسشىسىنىڭ حالىققا قىزمەت كورسەتۋ جونىندەگى ورىنباسارىنا قاتىستى سوتقا دەيىنگى تەرگەۋ جۇرگىزۋدە.
ول قۇجاتتاردى كەدەرگىسىز قابىلداۋ جانە جۇرگىزۋشى كۋالىكتەرىن الۋ ءۇشىن اۆتومەكتەپ كۋرسانتتارىن ەمتيحان تاپسىرۋعا جىبەرۋ سىلتاۋىمەن جەرگىلىكتى كاسىپكەردەن 930 مىڭ تەڭگە سوماسىندا الاياقتىق جولمەن اقشا قاراجاتىن يەمدەندى دەپ كۇدىكتەلۋدە.
ونىڭ ءىس-ارەكەتتەرىنە قورىتىندى باعانى سوت بەرەدى.
سىبايلاس جەمقورلىققا قارسى قىزمەت «كومەكشىلەرگە» جۇگىنبەۋگە جانە زاڭناما شەڭبەرىندە مەملەكەتتىك قىزمەتتەردى الۋعا كەڭەس بەرەدى.
ءسىز وسىنداي فاكتىلەرگە تاپ بولعان ادام 1424 ءنومىرى بويىنشا Call-ورتالىققا، @AntikorKZ_bot Telegram-بوتىنا جانە قابانباي باتىر داڭعىلى، 19 ب مەكەن- جايى بويىنشا حابارلاسۋعا بولادى.
