Google جاڭا جاساندى ينتەللەكت مودەلىن تانىستىردى

ازىرلەۋشىلەردىڭ ايتۋىنشا، مودەلدىڭ باستى ەرەكشەلىكتەرىنىڭ ءبىرى - بىرنەشە كۇن بويى ۇزدىكسىز جۇمىس ىستەي الۋى. Gemini 4 Carbon ۇلكەن كود بازالارىن زەرتتەپ، جۇيەدەگى اقاۋلاردىڭ سەبەبىن انىقتايدى، قاجەتتى تۇزەتۋلەر ەنگىزەدى. العاشقى ارەكەتتەرى ءساتسىز بولسا، ماسەلەنى شەشۋدىڭ باسقا جولدارىن ىزدەيدى. ازىرگە Google بۇل مۇمكىندىكتەردى كومپانيا ىشىندەگى سىناقتار بارىسىندا باعالاعان.

Google مالىمەتىنشە، كومپانيانىڭ ءوز سىناقتارىندا Gemini 4 Carbon قاۋىپسىز كود جازۋ كورسەتكىشى بويىنشا Gemini 4 Argon مودەلىنەن ەكى ەسەدەن استام جوعارى ناتيجە كورسەتكەن. بۇدان بولەك، Artificial Analysis Intelligence Index v5.0 رەيتينگىندە 59 بالل جيناپ، ءبىرىنشى ورىنعا شىققان.

جاڭا مودەل كەزەڭ-كەزەڭىمەن قولدانىسقا ەنگىزىلەدى. العاشقى كەزەڭدە Gemini 4 Carbon-عا كيبەرقاۋىپسىزدىك سالاسىندا ىرىكتەلگەن ماماندار مەن Fairwind باعدارلاماسىنىڭ سەنىمدى سەرىكتەستەرى قول جەتكىزە الادى. كەيىن Google مودەلدى ازىرلەۋشىلەرگە، ۇيىمدارعا جانە قاراپايىم پايدالانۋشىلارعا ۇسىنۋدى جوسپارلاپ وتىر.

كومپانيا API ارقىلى جۇمىس ىستەۋ تاريفتەرىن دە جاريالادى. ءبىر ميلليون كىرىس توكەنىنىڭ قۇنى - 2 دوللار، ءال بىر ميلليون شىعىس توكەنى - 10 دوللار. باعا مودەل وڭدەيتىن دەرەكتەر كولەمىنە بايلانىستى بەلگىلەنەدى.

ەسكە سالايىق، Google بۇعان دەيىن Gemini توپتاماسىنداعى Gemini 4 Argon مودەلىن تانىستىرعان بولاتىن. ول باعدارلامالاۋ، گرافيكتەردى تالداۋ، ۇزاق بەينەجازبالاردان قاجەتتى مالىمەتتەردى تابۋ جانە قۇجاتتارداعى اقپاراتتى وڭدەۋ مىندەتتەرىنە ارنالعان.