فونتاندا كوز جۇمعان جىگىت ۇ ب ت تاپسىرۋعا كەلگەن: مينيستر ءىستىڭ ءمان-جايىن ايتتى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك الماتىدا سۋبۇرقاق جانىندا تالاپكەردىڭ قايتىس بولۋىنا پىكىر ءبىلدىردى.

«وقيعا ساعات 16.00-دە بولعان. كۇن رايى وتە ىستىق بولىپ تۇرعان. تىيىم سالاتىن بەلگى تۇرعانىنا قاراماستان، سۋبۇرقاققا تۇسكەن. ول سۋبۇرقاقتىڭ ەكى «توستاعانى» بار، ول تۋرا ىشىنە كىرگەن. ءولىمنىڭ سەبەبى بۇگىن سوت- مەديتسينالىق ساراپتامادان كەيىن بەلگىلى بولۋى كەرەك. الدىن الا مالىمەت بويىنشا، جۇرەگى توقتاپ قالعان نەمەسە توك سوققان بولۋى مۇمكىن»، - دەدى ول.

مينيستر قايتىس بولعان تالاپكەردىڭ الماتىداعى № 185 مەكتەپتى ءتامامداعانىن ايتتى.

ۋنيۆەرسيتەتكە ۇبت تاپسىرۋ ءۇشىن كەلگەنىمەن، ەلەكتر قۋاتىنىڭ اقاۋىنا بايلانىستى تەست تاپسىرىپ ۇلگەرمەگەن.

«سوت- مەديتسينالىق ساراپتامانىڭ قورىتىندىسىن كۇتۋ كەرەك. بۇل ماسەلەمەن بوستاندىق اۋدانىنىڭ پوليتسيا باسقارماسى اينالىسىپ جاتىر. سالعىرتتىق سالدارى ما، الدە وقىس وقيعا ما، ازىرگە بىلمەيمىز»، - دەدى ساياسات نۇربەك.

ەسكە سالا كەتەيىك، 19-ماۋسىم كۇنى الماتىدا ءال-فارابي اتىنداعى قازاق ۇلتتىق ۋنيۆەرسيتەتى اۋماعىندا جاسوسپىرىم قايتىس بولعانىن حابارلاعان ەدىك.

اۆتور

ەسىمجان ناقتىباي