ف. مەرس: ۋكرايناداعى اسكەري وپەراتسيا جۋىردا اياقتالمايدى

استانا. قازاقپارات - گەرمانيا كانسلەرى فريدريح مەرس: «ۋكرايناداعى قارۋلى وپەراتسيا جاقىن ارادا اياقتالمايدى»، - دەپ مالىمدەدى. بۇل تۋرالى نەمىس ۇكىمەتىنىڭ باسشىسى فينليانديا پرەمەر- مينيسترىمەن كەزدەسۋىندە ايتتى.

ونىڭ سوزىنشە، قارۋلى قاقتىعىس توقتاۋى ءۇشىن ەكى جاقتىڭ اسكەري جانە ەكونوميكالىق الەۋەتى السىرەۋى ءتيىس. «قازىر قوس تاراپ تا وعان جەتە قويعان جوق»، - دەيدى مەرس.

جۋىردا ۋكرايناعا زىمىراندار جەتكىزىپ بەرگەن گەرمانيا ونىمەن قورعانۋ ءۇشىن عانا ەمەس، رەسەي اۋماعىن بومبالاۋعا دا رۇقسات ەتتى.

فريدريح مەرس، گەرمانيا كانسلەرى:

- شابۋىلعا تويتارىس بەرۋمەن عانا شەكتەلسە، ەشكىم ءوز ەلىن تولىق قورعاي المايدى. جاۋعا قارسى تۇرۋ ءۇشىن ونىڭ اۋماعىنداعى اسكەري نىسانداردى جويۋ قاجەت.

سونداي-اق ەۋرووداق قارت قۇرلىقتا قاۋىپسىزدىكتى قامتاماسىز ەتۋ جونىندەگى ءىس-قيمىل جوسپارىن بەكىتتى. ياعني، ەندى قارۋ-جاراق قورى قۇرىلادى. قورعانىس سالاسىن نىعايتۋ جۇمىستارىنا 150 ميلليارد ەۋرو باعىتتالادى. باستامانى ۇيىمعا مۇشە 27 ەلدىڭ 26 سى قولداسا، ۆەنگريا قالىس قالعان. 2022 -جىلدان بەرى ەۋرووداق ەلدەرى قورعانىس سالاسىن قارجىلاندىرۋدى %30- كە ارتتىرعان ەدى. «الايدا، وداق ەلدەرى بۇنىڭ ءوزى جەتكىلىكسىز»، - دەپ وتىر.

24.kz