شىمكەنتتىك تۇلەك الەمنىڭ 40 ۋنيۆەرسيتەتىنەن وقۋعا شاقىرتۋ الدى
استانا. KAZINFORM - الەمنىڭ 40 ۋنيۆەرسيتەتىنەن شاقىرتۋ العان شىمكەنتتىك تۇلەك سۋناتۋللا وكتاموۆ كەيىن قازاقستانعا كەلىپ، ەلدىڭ بيزنەسىن دامىتۋ جوسپارىندا بارىن ايتتى.

بۇل تۋرالى 24.KZ تەلەارناسى حابارلايدى.
تەلەارنا مالىمەتىنشە، شىمكەنتتىك تۇلەكتىڭ ءبىلىم دەڭگەيى مەن قابىلەت-قارىمىن امەريكا، كانادا، تۇركيا مەن بىرىككەن اراب امىرلىكتەرىنىڭ الدىڭعى قاتارلى وقۋ وردالارى جوعارى باعالاعان. سۋناتۋللا وكتاموۆ تاڭداۋى مالايزيا مەملەكەتىنە ءتۇستى. سۋناتۋللا ءبىلىم سىناقتارىنان بولەك، ءوزىنىڭ جان- جاقتىلىعىن دا دالەلدەي الدى.
اعىلشىن تىلىندە الەۋمەتتىك جوبالار مەن ۆولونتەرلىك كلۋب قۇرۋ تۋرالى باستاماسىن ءساتتى قورعادى. سونداي- اق ماماندىعى بويىنشا «بيزنەس باسقارۋ» سالاسىندا حالىقارىلىق بولجامدار دا جاساعان. جاس ىزدەنىمپاز بولاشاق ماماندىعىنا ءبىر جىل بۇرىن جوسپار قۇرعان. «مەن وسىعان 1 جىل دايىندالعاننىڭ ىشىندە ماعان پروفوريەنتولوگ ماماندار كومەكتەستى. تاعى مۇعالىمدەر كومەكتەستى. مەن جۇزدەن استام ۋنيۆەرگە تاپسىردىم. سونىڭ ىشىندە 40 ۋنيۆەرسيتەت مەنى شاقىردى. مالايزيادا 4-5 جىل وقيمىن. سوسىن ەلگە قايتىپ، بيزنەس جاعىنان ەلدى دامىتۋ ويىمدا»، - دەيدى سۋناتۋللا وكتاموۆ.