شىمكەنتتە ساياباق مەملەكەتكە قايتارىلادى
استانا. قازاقپارات - شىمكەنتتە «كەڭ بابا» اتىنداعى ساياباق مەملەكەتكە قايتارىلادى. سوت شەشىمىمەن كاسىپكەرگە جالعا بەرۋ تۋرالى شارتتاردىڭ كۇشى جويىلدى. بۇل تۋرالى قالالىق اكىمدىك ايتتى. سەبەبى دەمالىس ورنىن جاڭعىرتۋعا باعىتتالعان جوبالار ورىندالماي، جەر ۋچاسكەسى تالان- تاراجعا تۇسكەنى اشكەرە بولدى.
«كەڭ بابا» اتىنداعى وتباسىلىق ساياباق جەكەمەنشىككە جالعا بەرىلگەندە مەيرامحانا مەن ءدامحانالار كوپتەپ اشىلدى. بالالارعا ارنالعان ءتۇرلى ويىن- ساۋىق اتتراكتسيونى ورناتىلدى. ءبىراق قورشالعان جەر ۋچاسكەلەرىنەن جاياۋ جۇرەتىن جول تارىلىپ، قاۋىپسىزدىك تالاپتارى كۇمان تۋدىرا باستادى. كوپشىلىك وسى جايتكە بايلانىستى ءجيى شاعىمداناتىن.
4 گەكتار جەردى الاتىن ساياباق وتكەن عاسىردىڭ باسىندا قۇرىلعان. ال 1999 -جىلى كاسىپكەركە جالعا بەرىلىپ، دەمالىس ورنىن جاڭعىرتۋ تۋرالى شارت جاسالعان. ءبىراق بيزنەس ءوز مىندەتتەمەسىن ورىنداي المادى، - دەيدى قالالىق ساۋلەت جانە جەر قاتىناستارى باسقارماسى باسشىسىنىڭ ورىنباسارى.
ارمان ابدەشوۆ، قالالىق ساۋلەت جانە جەر قاتىناستارى باسقارماسى باسشىسىنىڭ ورىنباسارى:
- بالالارعا ارنالعان كەيبىر اتتراكتسيونداردىڭ تەگىن بولۋى، اۋماقتا بالالاردى دامىتۋ ورتالىعى بولۋى كەرەك ەدى. بۇل كىسىلەر ءوز مىندەتتەمەلەرىن ورىندامادى. كەرىسىنشە تال كەسىپ، بۋرسچاتكا كوبەيتىپ، بەتون، تاس كوبەيتىپ تاستاعان. بيىل ينۆەستيتسيالىق شارت ارقىلى تاعى 5 گۇلزار اشىلادى. بىزدە جالپى 6 مەملەكەتتىك- جەكەشەلىك سەرىكتەستىك اياسىندا اتقارىپ جاتقان مەردىگەر مەكەمەلەرمەن وسى جىلعا ءار اۋداننان ءبىر- ءبىر پاركتەن سالۋدى جوسپارلاۋدامىز. ءبىز ورىندارىن انىقتاپ، پروەكتىنى باستايتىن بولامىز جاقىن ارادا.
جەرگىلىكتى بيلىك «كەڭ بابا» ساياباعىن جايلى ورتانى دامىتۋ باسقارماسىنىڭ مەنشىگىنە بەرىپ، قايتا قۇرۋدى جوسپارلاپ وتىر. بيىل قالا اۋماعىندا قاراۋسىز قالعان 10 دەمالىس ورنى تۇرعىندار يگىلىگىنە قايتارىلدى.
24.kz
