شىمكەنتتە ەلىمىزدەگى ەڭ ۇلكەن جىلىجاي سالىنادى

شىمكەنت. KAZINFORM - شىمكەنتتە 650 گەكتار جەرگە ەلىمىزدەگى ەڭ ۇلكەن جىلىجاي سالىنادى. بۇل تۋرالى قالا اكىمى عابيت سىزدىقبەكوۆ ايتتى.

«ۇكىمەتتىڭ 2028 -جىلعا دەيىنگى بەكىتىلگەن جوسپارىنا سايكەس، قالاعا 5,6 تريلليون تەڭگە ينۆەستيتسيا تارتۋ كوزدەلگەن. بۇگىننىڭ وزىندە 2,7 تريلليون تەڭگە بولاتىن 30 مىڭنان اسا جاڭا جۇمىس ورنىمەن 220 ينۆەستيتسيالىق جوبانىڭ پۋلى جاساقتالدى. ونىڭ ىشىندە، كەلەسىدەي ءىرى جوبالار بار: «Alarko Holding» تۇرىك كومپانياسى 650 گەكتار جەرگە سالاتىن قۇنى 650 ميلليون اق ش دوللارلىق ەلىمىزدە اۋماعى جاعىنان ەڭ ۇلكەن زاماناۋي جىلىجاي كەشەنى جوباسى. ونىڭ 500 گەكتارىنا جىلىجاي، قالعان 150 گەكتارعا وقۋ كورپۋسى، قويما، زەرتحانا مەن جاتاقحانالار سالىنادى. جوبا كەزەڭ-كەزەڭمەن جۇزەگە اسىرىلادى. بۇگىنگى تاڭدا، ينۆەستيتسيا قۇنى 226 ميلليون ا ق ش دوللارىن قۇرايتىن جوبانىڭ 1 كەزەڭىنە 208 گەكتار جەر تەلىمى ءبولىنىپ، جەردى دايىنداۋ جۇمىستارى باستالدى»، - دەدى قالا اكىمى و ك ق الاڭىندا.

سونداي- اق، عابيت سىزدىقبەكوۆ وتكەن اپتادا پولشالىق «Fabe Polska» كومپانياسىمەن قۇنى 200 ميلليون ا ق ش دوللارىن قۇرايتىن 150 گەكتار اۋماققا جوعارى تەحنولوگيالى جىلىجاي سالۋ بويىنشا كەلىسىمگە قول قويىلعانىن ايتتى. مۇندا جىلىنا 36 مىڭ توننا قىزاناق پەن قيار ءونىمى الىنىپ، 800-دەن استام ادام جۇمىسپەن قامتىلادى.

قالا باسشىسى جىلىجايلاردان بولەك تاعى ءىرى ەكى جوبانى اتاپ ءوتتى.

«AKSA energy» كومپانياسى قۇنى 700 ميلليون ا ق ش دوللارى بولاتىن قۋاتتىلىعى 500 مۆت بۋ گاز قوندىرعىسىن سالادى. جوبانى ىسكە اسىرۋ ارقىلى قالا تۇرعىندارى ساپالى ەلەكتر جانە جىلۋ ەنەرگياسىمەن قامتاماسىز ەتىلەدى. تاعى ءبىر ءىرى جوبا - «INTERTRANS» كومپانياسىنىڭ 150 ميلليون ا ق ش دوللارىنا مۇناي ونىمدەرىن تەرەڭ وڭدەۋ ارقىلى ۇنتاقتالعان پوليپروپيلەن وندىرەتىن زاۋىت سالۋى. جوبانى ىسكە اسىرۋعا 30 گەكتار جەر تەلىمى ءبولىندى»، - دەدى ول.

ايتا كەتەيىك، بۇعان دەيىن قالا باسشىسى شىمكەنتتە وڭدەۋ ونەركاسىبى سالاسىندا 12 جوبا ىسكە قوسىلىپ، 1000-نان استام جاڭا جۇمىس ورنى اشىلعانىن ايتقان بولاتىن.

سونداي- اق، قالادا جاڭادان 2 يندۋستريالىق ايماق ىسكە قوسىلعانى ايتىلدى.

اۆتور

ەربول جانات