شىمكەنتتە اياق كيىم وندىرىسىنە قاجەتتى مامانداردى دايارلايدى

استانا. قازاقپارات - شىمكەنتتە بيىلدان باستاپ اياق كيىم ونەركاسىبىنە ماماندار دايارلايدى، دەپ حابارلايدى 24KZ.

جەرگىلىكتى كوللەدجدىڭ بىرىندە جاڭا ماماندىق اشىلماق. وسى سالاعا بەت بۇرعان جاستارعا ءبىلىم گرانتى دا بولىنەدى. قازىر مەگاپوليستە 4 اياق كيىم فابريكاسى جۇمىس ىستەيدى. ءبىراق بىلىكتى مامان تاپشى. قازىردىڭ وزىندە مىڭعا تارتا كادر قاجەت.

 سونداي- اق «جۇمىسشى ماماندىقتار جىلى» اياسىندا بيىل «كيىم ديزاينى» ماماندىعىن اشۋ جوسپارلانىپ وتىر. وسىعان بايلانىستى «جاس مامان» باعدارلاماسى بويىنشا رەسپۋبليكالىق بيۋدجەتتەن بولىنگەن 275 ميلليون تەڭگەگە يتاليا مەن جاپونيادان كەرەكتى قۇرال-جابدىقتار ساتىپ الىنعان.

جىبەك جولداسبەك، ستۋدەنت:

 - كيىمدى قالاي تىگۋ كەرەك؟ ونى قالاي قۇراستىرۋ كەرەك؟ ونى قالاي پىشەدى، تىگەدى؟ ونىڭ بارلىق تەحنيكاسىن بۇل جەردە ۇيرەتەدى جانە دە مەن جاقسى ۇيرەنىپ شىقتىم دەپ ويلايمىن.

گۇلميرا تاعايەۆا، جەڭىل ونەركاسىپ جانە سەرۆيس كوللەدجىنىڭ ديرەكتورى:

- ول كەلەشەكتە قاي جۇمىس ورىنعا بارادى؟ سول جۇمىس ورنىنىڭ تەحنولوگياسى قانداي نەگىزگە الىنادى؟ ءىرى اياق كيىم فابريكالارىمەن جۇمىس جاساي وتىرىپ، ول جەردەگى تەحنولوگيالارمەن تانىستىق. ول جەردەگى مامانداردىڭ، جاڭاعى اياق كيىم مامانى قانداي بولۋى كەرەك دەگەندى نەگىزگە الا وتىرىپ، ق ر- داعى وسى اياق كيىم ءىسى بويىنشا ءبىلىم بەرۋ ستاندارتىن نەگىزگە الا وتىرىپ، ءبىز وسى وقۋ باعدارلاماسىن جاسادىق.