شىمبۇلاقتا شەتەلدىك تۋريستەر جانجال شىعاردى
الماتى. KAZINFORM - الماتىنىڭ تاۋ-شاڭعى كۋرورتىندا جانجال شىعارعان شەتەلدىكتەردى ءتارتىپ ساقشىلارى ۇستادى.

الەۋمەتتىك جەلىدە «شىمبۇلاق» كۋرورتىندا بولعان توبەلەستىڭ بەينەجازباسى تارادى. كۋرورت اكىمشىلىگىنىڭ مالىمەتىنشە، ماساڭ كۇيدە شەتەلدىك تۋريستەر «شىمبۇلاق» قىزمەتكەرلەرىمەن جانجال شىعارعان.
- شەتەلدىك قوناقتار توبى ماس كۇيىندە تاۋ شاڭعى مەكتەبىنىڭ قىزمەتكەرلەرىمەن جانجال شىعاردى. كيكىلجىڭدى كۋرورتتىڭ قاۋىپسىزدىك قىزمەتى توقتاتتى. قۇقىقبۇزۋشىلار ءتارتىپ ساقشىلارىنا بەرىلدى. وقيعاعا بايلانىستى دەرەۋ ىشكى تەكسەرۋ جۇرگىزىلدى، سونداي-اق بەلگىلەنگەن قاۋىپسىزدىك ستاندارتتارىنا سايكەس قاجەتتى شارالار قابىلداندى، - دەپ حابارلادى «شىمبۇلاقتىڭ» باسپا ءسوز قىزمەتى.
سونىمەن قاتار كۋرورت اكىمشىلىگىنىڭ مالىمەتىنە سايكەس، توبەلەستىڭ تۋىنداۋىنا كاسسيردىڭ جۇمىس ورنىنان ۋاقىتشا كەتىپ قالۋى سەبەپ بولعان. قىزمەت كورسەتۋ ۋاقىتىنىڭ ۇزاقتىعىنا اشۋلانعان شەتەلدىكتەر وزگە قىزمەتكەرلەرگە قول جۇمساعان. الماتى قالاسىنىڭ پوليتسيا دەپارتامەنتى بۇل وقيعاعا بايلانىستى بارلىعى 5 ادام ۇستالعانىن مالىمدەدى.
- مەدەۋ اۋداندىق پوليتسيا باسقارماسى بۇزاقىلىق دەرەگى بويىنشا قىلمىستىق ءىس قوزعادى. وسى قىلمىستى جاسادى دەگەن كۇدىكپەن بەس ادام قاماۋعا الىندى. ولار ۋاقىتشا ۇستاۋ يزولياتورىنا قامالدى. باسقا ءدا مان-جاعدايلارى انىقتالىپ جاتىر، - دەپ حابارلادى پوليتسيادان.
ەسكە سالايىق، بۇعان دەيىن ەلىمىزدە 4237 شەتەلدىك زاڭسىز تاكسي قىزمەتىن اتقارعانىن جازعانبىز.
اۆتور
دوسبول اتاجان