شيكىزاتقا تاۋەلدىلىكتى ازايتۋ: قازاقستان ەكونوميكاسىن دامىتۋ جولدارى تالقىلاندى
استانا. قازاقپارات - قازاقستاننىڭ ەكونوميكالىق ءوسىمىن ىنتالاندىرۋ، شيكىزاتتىق ەمەس سەكتوردى دامىتۋ جانە شەتەلدىك ينۆەستيتسيا تارتۋ ماسەلەلەرى ەكونوميكالىق ساياسات جونىندەگى كەڭەستىڭ وتىرىسىندا تالقىلاندى. جيىندى پرەمەر-مينيستر ولجاس بەكتەنوۆ وتكىزدى، دەپ حابارلايدى «24KZ».
وتىرىس بارىسىندا ەكونوميكالىق دامۋدىڭ وزەكتى ماسەلەلەرى بويىنشا حالىقارالىق ساراپشىلاردىڭ ۇسىنىستارى تىڭدالدى. قاتىسۋشىلار الەمدىك نارىقتارداعى قازىرگى احۋال، ەكونوميكالىق ءوسىمدى ىنتالاندىرۋ شارالارىنىڭ تيىمدىلىگىن ارتتىرۋ جانە حالىقتىڭ ءال-اۋقاتىنىڭ تۇراقتى وسۋىنە جاعداي جاساۋ ماسەلەلەرى بويىنشا پىكىر الماستى.
اڭگىمە بارىسىندا ەكونوميكا قۇرىلىمىن نىعايتۋ جانە شيكىزاتتىق ەمەس سەكتوردى ءارتاراپتاندىرۋ، قازاقستاننىڭ ونەركاسىپتىك ساياساتىن جەتىلدىرۋ جونىندە باستامالار ءسوز بولدى. ساراپشىلار شەتەلدىك ينۆەستيتسيالار اعىنىن كوبەيتۋ جانە جەكە كاسىپكەرلىكتى دامىتۋ ءۇشىن قولايلى جاعدايلار جاساۋ تاسىلدەرىن ۇسىندى. وڭىرلەردىڭ ونەركاسىپتىك ماماندانۋىن دامىتۋعا، ەكسپورتتىق الەۋەتتى كەڭەيتۋگە جانە ستراتەگيالىق ينۆەستورلاردى تارتۋعا نازار اۋدارىلدى. سونداي-اق جەكە كاپيتالدىڭ قاتىسۋىن كەڭەيتۋ ماسەلەلەرى تالقىلاندى. جيىن قورىتىندىسى بويىنشا پرەمەر-مينيستر جاۋاپتى مەملەكەتتىك ورگاندار مەن ۇيىمدارعا ايتىلعان ۇسىنىستارعا تالداۋ جۇرگىزۋدى تاپسىردى.
