شىعىس قازاقستاندا 8 -ناۋرىز مەرەكەسىنە وراي 16 مىڭعا جۋىق ايەل ءبىر رەتتىك تولەم الادى

وسكەمەن. KAZINFORM - شىعىس قازاقستان وبلىسىندا 8 -ناۋرىز - حالىقارالىق ايەلدەر كۇنىنە وراي بىرنەشە ساناتتاعى ايەلدەرگە 15 مىڭ تەڭگە كولەمىندە تولەم بەرىلەدى.

بۇل تۋرالى وبلىس اكىمدىگىنەن ءمالىم ەتتى.

- حالىقتى الەۋمەتتىك قورعاۋ جۇيەسىندە انا مەن بالانى قولداۋ تەتىكتەرى كوزدەلگەن. وسى رەتتە، 8 -ناۋرىز - حالىقارالىق ايەلدەر كۇنى قارساڭىندا وبلىستا «التىن القا»، «كۇمىس القا» القالارىمەن ناگرادتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ناگرادتالعان ايەلدەرگە، 4 جانە ودان دا كوپ كامەلەتكە تولماعان بالاسى بار انالارعا 15000 تەڭگە مولشەرىندە ءبىرجولعى تولەم بەرىلەدى، - دەلىنگەن اقپاراتتا.

بۇگىندە شىعىس قازاقستاندا 12400-دەن استام كوپ بالالى ايەل تۇرادى. ونىڭ ىشىندە: 4 جانە ودان دا كوپ كامەلەتكە تولماعان بالاسى بار 8829 ايەل بار. سونداي-اق «التىن القا»، «كۇمىس القا» القالارىمەن ماراپاتتالعان 3588 كوپبالالى انا تىركەلگەن.

ەسكە سالساق، بۇعان دەيىن استانادا 8 -ناۋرىز مەرەكەسىنە وراي 36 مىڭ ايەل ادامعا ءبىرجولعى الەۋمەتتىك تولەم بەرىلەتىندىگى حابارلانعان.

اۆتور

تالعاتجان مۇحامەتبەك ۇلى