شىعىس قازاقستان وبلىسىنداعى قالا، اۋدان اكىمدەرىنىڭ جالاقىسى قانشا
وسكەمەن. KAZINFORM - شىعىس قازاقستان وبلىسىنداعى قالا، اۋدان اكىمدەرى اي سايىن قانشا جالاقى الادى؟
وسىنى Kazinform ءتىلشىسى ءبىلىپ كوردى.
ءاربىر قالا، اۋدان اكىمىنە رەسمي ساۋالحات جولدادىق. كەيبىر اكىمدەر بىردەن جاۋاپ بەرسە، كەيبىرى «اي سايىنعى جالاقىمىز زاڭعا سايكەس» نەمەسە «جالاقى اي سايىن تۇسەدى» دەگەن سياقتى قيسىنعا كەلمەيتىن جاۋاپتار بەردى. ولارعا بۇل جاۋاپتارىنىڭ باق زاڭىنا قايشى ەكەندىگىن ءتۇسىندىرىپ، قايتا حات جولداعانىمىزدا ءوز ەڭبەكاقىلارىن ناقتى ايتۋىنا تۋرا كەلدى.
التاي اۋدانىنىڭ اكىمى رەنات قۇرمامبايەۆتىڭ جالاقىسى - 990916 تەڭگە. بۇل سومادان زەينەتاقى، سالىق جانە مىندەتتى الەۋمەتتىك مەديتسينالىق ساقتاندىرۋ قورىنا تولەمدەر ۇستالادى. دەمەك، اكىمنىڭ بۇل ايلىقتان قولعا الاتىنى 22 پايىزعا از. ۋنيۆەرسيتەتتى 2001 -جىلى «ينجەنەر- پەداگوگ» ماماندىعى بويىنشا بىتىرگەن رەنات قۇرمامبايەۆ مەملەكەتتىك قىزمەتتەگى ەڭبەك ءوتىلىن 2003 -جىلدىڭ اقپانىندا كاتونقاراعاي اۋدانى اكىمدىگىندە باستاعان.
گلۋبوكوە اۋدانىنىڭ اكىمى ەلدار تۋماشينوۆتىڭ جالاقىسى - 869870 تەڭگە. 2011 -جىلى قازۇپۋ- دى ەكونوميكا ماماندىعى بويىنشا بىتىرگەن اكىم «Kazenergy» جۇمىس ءوتىلىن استانا قالاسىنداعى «قازاقستاندىق مۇنايگاز جانە ەنەرگەتيكالىق ۇيىمداردى اسسوتسياتسياسى» حالىقارالىق قارىم- قاتىناس بويىنشا دەپارتامەنتىنىڭ ەكسپەرت- ساراپشىسى رەتىندە باستاعان.
زايسان اۋدانىن باسقارىپ وتىرعان شىعىس قازاقستان وبلىسىنداعى جالعىز اكىم ايەل اەليتا احمەتسالىم قىزىنىڭ ەڭبەكاقىسى - 990996 تەڭگە. ول 1989 -جىلى وسكەمەن پەداگوگيكالىق ينستيتۋتىن «دەنە شىنىقتىرۋ» ماماندىعى بويىنشا اياقتاعان.
1989 -جىلدان 2021 -جىلعا دەيىن مەملەكەتتىك كومپانيالاردا جانە كوممەرتسيالىق قۇرىلىمداردا مامان بولعان. 2021 -جىلدان شىعىس قازاقستان وبلىسىنىڭ وبلىستىق ءماسليحاتىنىڭ دەپۋتاتى. ال اكىمدىكتەگى قىزمەتىن بىردەن اكىم لاۋازىمىنان باستاعان. زايسان اۋدانىن 2023 -جىلعى 14- ماۋسىمنان بەرى باسقارىپ كەلەدى.
كاتونقاراعاي اۋدانى اكىمىنىڭ مىندەتىن اتقارۋشى راسۋل كارابالينوۆتىڭ جالاقىسى - 862652 تەڭگە. وسىدان ەكى اپتا بۇرىن عانا اۋدانعا اكىم بولىپ دانيار دۇيسەنبايەۆ تاعايىندالعان. الايدا ول ءالى ايلىعىن قولعا الىپ ۇلگەرگەن جوق.
كۇرشىم اۋدانىنىڭ اكىمى المات اقىشوۆتىڭ ەڭبەكاقىسى - 941 مىڭ تەڭگە. 2011 -جىلى ل. ن. گۋميليەۆ اتىنداعى ەۋرازيالىق ۇلتتىق ۋنيۆەرسيتەتىن «تۋريزم» ماماندىعى بويىنشا بىتىرگەن اكىمنىڭ مەملەكەتتىك قىزمەتتەگى جالپى ەڭبەك ءوتىلى 11 جىلدان اسادى.
وسكەمەن قالاسىنىڭ اكىمى جاقسىلىق وماردىڭ جالاقىسى - 926102 تەڭگە. قالانى باسقارىپ كەلە جاتقانىنا 6 جىلدان اسقان ول 2001 -جىلى اباي اتىنداعى الماتى مەملەكەتتىك ۋنيۆەرسيتەتىن «گەوگرافيا» ماماندىعى بويىنشا بىتىرگەن.
ريددەر قالاسىنىڭ اكىمى دۋمان راحمەتقاليەۆتىڭ قولعا الاتىن جالاقىسى - 745864 مىڭ تەڭگە. 2011 -جىلى حالىقارالىق پراگا ۋنيۆەرسيتەتىن «حالىقارالىق ساۋدا» ماماندىعى بويىنشا بىتىرگەن ول جۇمىس ءوتىلىن 2011 -جىلى «تەپلوەنەرگوسناب» ج ش س- دا ەكونوميست بولىپ باستادى.
سامار اۋدانى اكىمىنىڭ مىندەتىن اتقارۋشى جاسۇلان مايكەنيەۆ بۇدان الدەقايدا از ايلىق الادى. ناقتى ايتقاندا، قولعا - 526 مىڭ تەڭگە. شىعىس قازاقستان مەملەكەتتىك ۋنيۆەرسيتەتىندە «قۇقىق تانۋ» ماماندىعى بويىنشا ءبىلىم العان شەنەۋنىك مەملەكەتتىك قىزمەتتە 2008 -جىلدان بەرى جۇمىس ىستەپ كەلەدى. ءبىراق وسى ۋاقىتقا دەيىن بىردە- ءبىر رەت ءبىرىنشى باسشى بولىپ كورگەن ەمەس.
تارباعاتاي اۋدانىنىڭ اكىمى دارحان جورگەكبايەۆتىڭ ەڭبەكاقىسى قولعا - 786848 تەڭگە. وسى اۋداننىڭ اقجار اۋىلىندا دۇنيەگە كەلگەن ول ەڭبەك ءوتىلىن شىعىس قازاقستان وبلىستىق اقپاراتتىق- ستاتيستيكالىق ورتالىعى باعا ستاتيستيكاسى ءبولىمىنىڭ مامانى- باعا تىركەۋشىسى بولىپ باستاعان.
ۇلان اۋدانىنىڭ اكىمى ارمان بەكبوسىنوۆتىڭ جالاقىسى زەينەتاقى، سالىق جانە مىندەتتى الەۋمەتتىك مەديتسينالىق ساقتاندىرۋ قورىنا تولەمدەردى ۇستاماعاندا - 990916 تەڭگە. 1995 -جىلى وسكەمەن قۇرىلىس- جول ينستيتۋتىنىڭ ديپلومىن العان اكىم ەڭبەك جولىن «ش ق و اۆتوموبيل جولدارى» قازىنالىق كاسىپورنىنىڭ 1 ساناتتى ينجەنەرى رەتىندە باستادى.
شەمونايحا اۋدانىن باسقارىپ وتىرعان گريگوري اكۋلوۆتىڭ جالاقىسى - 990916 تەڭگە. 1991 -جىلى سەمەي زووتەحنيكالىق-مال دارىگەرلىك ينستيتۋتىن «مال دارىگەرى» ماماندىعى بويىنشا بىتىرگەن. وقۋدان سوڭ شەمونايحا اۋدانىندا «بەلوكامەنسكي» سوۆحوزىندا اعا، سودان كەيىن باس مال دارىگەر بولىپ جۇمىس ىستەدى. قازىرگى قىزمەتكە 2019 -جىلدىڭ قاڭتارىندا تاعايىندالعان.
اۆتور
تالعاتجان مۇحامەتبەك ۇلى
