شىعىس قازاقستان وبلىسىندا كونە ءسانبي تايپاسىنىڭ مولالارى تابىلدى
وسكەمەن. KAZINFORM - شىعىس قازاقستان وبلىسى كاتونقاراعاي اۋدانىندا كونە ءسانبي تايپاسىنىڭ مولالارى تابىلدى.
ءا. ح. مارعۇلان اتىنداعى ارحەولوگيا ينستيتۋتىنان ۇسىنعان مالىمەتكە سۇيەنسەك، كاتونقاراعاي اۋدانىنداعى ارشاتى اۋىلىنان 11 شاقىرىم قاشىقتىقتا ورنالاسقان تاۋتەكەلى شاتقالىندا ارحەولوگيالىق زەرتتەۋ جۇمىستارى جۇرگىزىلگەن. ناتيجەسىندە، I مىڭجىلدىقتىڭ ءبىرىنشى جارتىسىمەن مەرزىمدەلەتىن ءسانبي تايپاسىنا تيەسىلى 13 جەرلەۋ- ازا تۇتۋ كەشەنى تابىلعان.
«ورتاسىندا شۇڭقىرى بار مولالار تاستارمەن قورشالعان. تەرەڭدىگى شامامەن ءبىر مەتر بولاتىن مولا شۇڭقىرىندا نەگىزىنەن ەرەسەك ادامنىڭ مۇردەسى، سيرەك جاعدايدا بالالاردى جەرلەگەن. ال ەكى مولاعا جىلقىلاردى قوسا جەرلەگەنى انىقتالدى. مولا ىشىنە قىش ىدىس جانە جارتىلاي باعالى تاستاردان جاسالعان مونشاقتار دا قويىلعان»، - دەلىنگەن اقپاراتتا.
ايتا كەتەيىك، قازبا جەتەكشىسى - ءا. ح. مارعۇلان اتىنداعى ارحەولوگيا ينستيتۋتىنىڭ جەتەكشى عىلىمي قىزمەتكەرى ازات ايتقالي.
جازبا دەرەكتەرىنە سايكەس، سانبيلەر عۇن يمپەرياسى ىدىراعاننان كەيىن ورتالىق ازياداعى ەتنومادەني پروتسەستەردىڭ قالىپتاسۋى مەن دامۋىندا شەشۋشى ءرول اتقارعان كوشپەلى تايپا بولعان. ولاردىڭ ىقپالى ايماقتىڭ كوشپەلى قاۋىمداستىقتارىنىڭ مادەني جانە ساياسي دامۋىنىڭ ءارتۇرلى اسپەكتىلەرىنە، سونىڭ ىشىندە جاڭا مەملەكەتتىك قۇرىلىمداردىڭ قالىپتاسۋىنا، اسكەري داستۇرلەردىڭ دامۋىنا جانە الەۋمەتتىك- ەكونوميكالىق قۇرىلىمدارعا اسەر ەتتى.
