شي جينپيىڭ قىتايدىڭ ەلىمىزگە ەشقاشان زيانىن تيگىزبەيتىنىن ايتتى - پرەزيدەنت
استانا. KAZINFORM - مەملەكەت باسشىسى قاسىم-جومارت توقايەۆ «انا ءتىلى» گازەتىنە بەرگەن سۇحباتىندا قىتاي حالىق رەسپۋبليكاسىنىڭ ءتوراعاسى شي جينپيىڭنىڭ ەلىمىزگە جاساعان مەملەكەتتىك ساپارى بارىسىنداعى كەلىسسوزدەردىڭ باستى ناتيجەسىنە توقتالدى.
- قىتاي حالىق رەسپۋبليكاسىنىڭ ءتوراعاسى شي جينپيىڭنىڭ ەلىمىزگە جاساعان مەملەكەتتىك ساپارى وتكەن جىلدىڭ تاعى ءبىر ماڭىزدى وقيعاسى بولدى. سونداعى كەلىسسوزدەردىڭ باستى ناتيجەسى قانداي؟ اقپارات قۇرالدارىندا ءتوراعا سي ەكەۋىڭىزدىڭ ەل ۇكىمەتتەرىنە ءوزارا ساۋدا اينالىمىن ەكى ەسە ارتتىرۋ جونىندە مىندەت جۇكتەگەندەرىڭىز ايتىلدى. بۇل قول جەتكىزۋگە بولاتىن مەجە مە؟
- قىتاي حالىق رەسپۋبليكاسىنىڭ ءتوراعاسى ءسي تسزينپيننىڭ ءبىزدىڭ ەلدى جاقسى بىلەتىنىن، قازاق حالقىنا ىلتيپاتپەن قارايتىنىن اتاپ وتكەن ءجون. ءبىز ەكى جاقتى قارىم- قاتىناسقا، وڭىرلىك جانە حالىقارالىق احۋالعا قاتىستى بارلىق ماسەلەنى ەمەن- جارقىن تالقىلادىق. ەشقانداي كوزقاراس قايشىلىعى جوق. قىتاي ءۇشىن قازاقستان - اسا ماڭىزدى ستراتەگيالىق سەرىكتەس. قارقىندى ءارى جان- جاقتى دامىپ كەلە جاتقان قازاق- قىتاي ىنتىماقتاستىعى، شىن مانىندە، ماڭگى ستراتەگيالىق سەرىكتەستىك دەڭگەيىنە جەتتى. مۇنىڭ قازاقستان مۇددەسىنە ساي كەلەتىنى ءسوزسىز.
قازاقستانعا جاساعان مەملەكەتتىك ساپارى كەزىندە ءتوراعا شي جينپيىڭ قىتايدىڭ ەلىمىزگە ەشقاشان زيانىن تيگىزبەيتىنىن، ءبىزدىڭ ەگەمەندىگىمىز بەن تاۋەلسىزدىگىمىزدى بارىنشا قولدايتىنىن اتاپ ءوتتى. بۇل - وتە ماڭىزدى مالىمدەمە.
2023 -جىلى قازاقستان مەن قىتاي اراسىندا ءوزارا ۆيزاسىز رەجيم ورناتىلدى. جاڭا باستاما الىس- بەرىستى دامىتۋعا جانە ەكى حالىقتىڭ دوستىعىن نىعايتۋعا وڭ اسەرىن تيگىزىپ جاتىر. قازاقستان ازاماتتارى قىتايدى جاڭا قىرىنان تانىپ، ونىڭ تەحنولوگيالىق تۇرعىدان الىپ مەملەكەتكە اينالعانىنا كوز جەتكىزە باستادى. قىتاي جۇرتى ءدا بىزدىڭ وتانداستارىمىزعا دوستىق پەيىل تانىتىپ وتىر.
قىتايمەن جان- جاقتى ىنتىماقتاستىقتى ودان ءارى دامىتۋ قازاق ديپلوماتياسىنداعى ماڭىزدى مىندەتتىڭ ءبىرى بولىپ قالا بەرەدى. بۇل مەملەكەت - قازاقستاننىڭ نەگىزگى ساۋدا سەرىكتەسى، سونداي- اق ەكونوميكامىزداعى ەڭ ءىرى ينۆەستوردىڭ ءبىرى. ءوزارا ساۋدا اينالىمىن ەكى ەسە ارتتىرۋعا بارلىق مۇمكىندىك بار. ەڭ باستىسى، ەكى ەل باسشىلارىنىڭ ساياسي ەرىك- جىگەرى جەتكىلىكتى. سوندىقتان اتالعان ماقساتقا جەتۋگە ابدەن بولادى.
جوعارى دەڭگەيدەگى ديالوگ 2025 -جىلى دا جالعاسادى. ءتوراعا سي تسزينپين «ورتالىق ازيا - ق ح ر» سامميتىنە قاتىسادى دەپ جوسپارلانىپ وتىر. ونىڭ قازاقستانعا الداعى ساپارى، سونداي- اق بيىل كۇزدە قىتايدا وتەتىن كەلىسسوزدەر ەكى ەلدىڭ سان سالالى ىقپالداستىعىن ودان ءارى نىعايتۋعا سەپتىگىن تيگىزەدى دەپ سەنەمىن.
