شي جينپيڭ تاليبان ەلشىسىنەن سەنىم گراموتاسىن الدى

Си Цзиньпин
Фото: Талибан сыртқы істер министрлігі өкілінің твиттерде жариялаған суреті

استانا. KAZINFORM - قىتاي ءتوراعاسى شي جينپيڭ سەيسەنبى كۇنى اۋعانستانداعى تاليبان رەجيمىنىڭ قىتايداعى ەلشىسى بيلال كاريميمەن كەزدەستى.

ق ح ر سىرتقى ىستەر مينيسترلىگىنىڭ حابارلاۋىنشا، 30-قاڭتاردا ق ح ر ءتوراعاسى شي جينپيڭ حالىق ءماجىلىس زالىندا ق ح ر- داعى 42 ەلشىنىڭ سەنىم گراموتالارىن الدى. قىتايداعى وسى 42 ەلشىنىڭ اراسىندا اۋعانستانداعى تاليبان رەجيمىنىڭ ەلشىسى بيلال كاريمي دە بار.

بۇل قىتايدىڭ تاليبان رەجيمىمەن رەسمي تۇردە ديپلوماتيالىق قارىم-قاتىناس ورناتقانىن بىلدىرەدى. ناتيجەسىندە قىتاي تاليبان رەجيمىن مويىنداعان العاشقى ءىرى حالىقارالىق مەملەكەت بولدى.

Қытай мен Ауғанстан
فوتو: تاليباننىڭ سىرتقى ىستەر مينيسترلىگى وكىلىنىڭ تۆيتتەردە جاريالاعان سۋرەتى

شي جينپيڭ سەنىم گراموتالارىن قابىلداۋ راسىمىندە ءسوز سويلەپ، قىتاي بارلىق ەلدىڭ حالقىمەن دوستىقتى جوعارى باعالايدى جانە باسقا ەلدەرمەن تەڭدىك جانە ءوزارا تيىمدىلىك نەگىزىندە ىنتىماقتاستىقتى دامىتۋعا دايىن ەكەنىن ايتتى. بۇل تۋرالى تاليبان سىرتقى ىستەر مينيسترلىگىنىڭ باسپا ءسوز حاتشىسى ابدۋل كاحار بالحي X الەۋمەتتىك جەلىسىندە (بۇرىنعى Twitter) جازبا جاريالادى.

سونداي-اق سەنىم گراموتالارىن تاپسىرۋ ءراسىمى اياقتالعان سوڭ بيلال كاريميدىڭ قىتاي سىرتقى ىستەر ءمينيسترى ۋاڭ يمەن دە كەلىسسوزدەر جۇرگىزگەنى ايتىلدى.

2021-جىلدىڭ تامىزىندا بيلىككە ورالعاننان بەرى تاليبان اۋعانستاننىڭ، اسىرەسە كورشى ەلدەردەگى ديپلوماتيالىق ميسسيالارىنا تۇراقتى تۇردە باقىلاۋ ورناتتى. تاليبان قازىر پاكىستان، وزبەكستان جانە تۇركىمەنستاندى قوسا العاندا، كەم دەگەندە 14 ەلدەگى اۋعانستان ەلشىلىكتەرىن قاراۋىنا العان.

كەيبىر ەلدەر، سونىڭ ىشىندە رەسەي، قىتاي جانە يران كابۋلدا ءوز ەلشىلىكتەرىن ساقتادى.

رەسەي سىرتقى ىستەر ءمينيسترى سەرگەي لاۆروۆ وتكەن اپتادا نيۋ-يوركتە جۋرناليستەرگە ماسكەۋدىڭ ساياسي جانە ادام قۇقىقتارىنا بايلانىستى تاليبان رەجيمىن ءالى مويىنداماعانىن ايتتى.

اۆتور

ەركەجان سماعۇلوۆا

سوڭعى جاڭالىقتار