شۆەتسيادان اسا ءىرى كولەمدە مۇلىك جىمقىردى دەگەن كۇدىكتى ەكستراديتسيالاندى
استانا. KAZINFORM - بۇگىن باس پروكۋراتۋرا مەن قازاقستان رەسپۋبليكاسى ىشكى ىستەر مينيسترلىگىنىڭ ينتەرپول قىزمەتكەرلەرى قازاقستان رەسپۋبليكاسىنىڭ ستوكگولمدەگى ەلشىلىگىنىڭ كومەگىمەن بوتەننىڭ مۇلكىن اسا ءىرى كولەمدە جىمقىرعانى ءۇشىن قىلمىستىق جاۋاپكەرشىلىككە تارتۋ ماقساتىندا شۆەتسيا كورولدىگىنەن قازاقستان ازاماتىن ەكستراديتسيالادى.
ول 2015- 2020 -جىلى شىمكەنتتەگى ساۋدا ورتالىعىندا جۇمىس ىستەپ ءجۇرىپ، وزىنە سەنىپ تاپسىرىلعان 57 ميلليون تەڭگەگە جۋىق قاراجاتتى جىمقىردى دەگەن كۇدىككە ءىلىندى. قىلمىس جاساعاننان كەيىن كۇدىكتى جاسىرىنىپ، وعان حالىقارالىق ىزدەۋ جاريالانعان. اعىمداعى جىلدىڭ اقپان ايىندا ول شۆەتسيادا ۇستالدى.
- قازاقستان رەسپۋبليكاسى باس پروكۋراتۋراسىنىڭ ءوتىنىشى بويىنشا كۇدىكتى قازاقستانعا ەكستراديتسيالانىپ، ءقازىر استانا قالاسىنىڭ تەرگەۋ يزولياتورىنا قامالدى. ايىپتالعان قىلمىستى جاساعانى ءۇشىن مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 10جىلعا دەيىنگى مەرزىمگە ايىرا وتىرىپ نەمەسە ونسىز، 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان، - دەلىنگەن حابارلامادا.
ايتا كەتۋ كەرەك، شۆەتسيا كورولدىگىمەن ەكستراديتسيالاۋ تۋرالى كەلىسىمنىڭ جوقتىعىنا قاراماستان، سوتتالۋشىنى ەكستراديتسيالاۋ قازاقستان باس پروكۋراتۋراسى مەن شۆەتسيا ادىلەت مينيسترلىگى اراسىنداعى تىعىز ىنتىماقتاستىقتىڭ ارقاسىندا مۇمكىن بولدى.
ودان باسقا، وتكەن جىلى شۆەد تارابى قازاقستانعا ىزدەۋدە جۇرگەن 2 ادامدى ەكستراديتسيالاعان بولاتىن، ولار قازىر ءارتۇرلى جازا تۇرلەرىنە سوتتالعانىن ەسكە سالامىز.
اۆتور
اينۇر تۋماكبايەۆا
