قۇراندى ورتەگەن موميكا ءوز ۇيىندە وققا ۇشتى

استانا. قازاقپارات - 2023 -جىلى شۆەتسيا استاناسىندا بىرنەشە دۇركىن قۇراندى ورتەپ، مۇسىلمان ەلدەرىنىڭ نارازىلىعىن تۋدىرعان ەر ادام سوت ۇكىمى شىعۋدان ءبىر كۇن بۇرىن وققا ۇشتى.

Құранды өртеген Момика өз үйінде оққа ұшты
Фото: zaobao.com.sg

جەرگىلىكتى پوليتسيا وسى قىلمىسقا قاتىسى بار بەس ادامدى قاماۋعا الدى. بۇل تۋرالى سينگاپۋرلىق Lianhe Zaobao باسىلىمى حابارلادى.

شۆەتسيا پوليتسياسى بۇگىن يراكتان قونىس اۋدارعان سالۆان موميكانىڭ سارسەنبى كۇنى (29- قاڭتار) سەدەرتەلە قالاسىنداعى ءوز ۇيىندە اتىپ ولتىرىلگەنىن راستادى.

باسىلىمنىڭ جازۋىنشا، پوليتسيا كىسى ءولتىرۋ بابى بويىنشا تەرگەۋ جۇرگىزىپ، بەس ادامدى تۇندەلەتە قاماۋعا العان.

ستوكگولم سوتى بەيسەنبى كۇنى سالۆان موميكانىڭ قۇراندى ورتەۋىنىڭ «ناسىلدىك وشپەندىلىكتى قوزدىرۋعا» قاتىسى جايلى ۇكىم شىعارادى دەپ جوسپارلانعان ەدى. الايدا، سوت ۇكىم شىعارۋدى 3 -اقپانعا قالدىردى.

2023 -جىلدىڭ ماۋسىم ايىندا سالۆان موميكا ستوكگولمدەگى ۇلكەن مەشىتتىڭ الدىندا 200-گە جۋىق ادامنىڭ كوزىنشە قۇراننىڭ جۇلىنعان پاراقتارىن تابانىنا تاپتاپ، ورتەپ جىبەرەدى. ونىڭ بۇل ارەكەتى تۇركيا، يراك سياقتى ەلدەرمەن شۆەتسيا اراسىنداعى قارىم-قاتىناستىڭ شيەلەنىسۋىنە سەبەپ بولعان ەدى.

ءىستى قاراعان پروكۋروردىڭ ايتۋىنشا، شۆەتسيا زاڭدارىنا سايكەس قۇراندى ورتەۋ يسلام دىنىنە سىن رەتىندە قاراستىرىلىپ، ءسوز بوستاندىعى اياسىندا قورعالۋى مۇمكىن. الايدا، وقيعانىڭ ناقتى ءمان-جايىنا جانە موميكانىڭ قۇراندى ورتەۋ كەزىندە ايتقان سوزدەرىنە بايلانىستى بۇل ارەكەت «بەلگىلى ءبىر ەتنوستىق توپقا قارسى وشپەندىلىكتى قوزدىرۋ» رەتىندە باعالانۋى دا مۇمكىن.

دۇنيەجۇزىلىك مۇسىلماندار قاۋىمىنىڭ كەڭەسى شۆەتسيادا قۇران كىتاپتىڭ ورتەلۋىن سىنادى.

اۆتور

ەرلان مازان

سوڭعى جاڭالىقتار