شۆەتسياعا قوقىس جەتپەي جاتىر
استانا. قازاقپارات - ءبىز قوقىس، قالدىقتان ارىلا الماي جاتساق، شۆەدتەر ونى ساتىپ الىپ جاتىر. ءتىپتى ساتىپ الۋعا قوقىس جوق. ونى وزگە ەلدەردەن ەكسپورتتايدى.
كاسىپتىڭ كوزىن تاپقان ەل وسى. ءسويتىپ ەۋروپالىقتار ءبىرى قوقىس ساتىپ الىپ، ءبىرى ساتىپ پايدا تاۋىپ جاتىر. ال جاپوندار قوقىستان التىن وندىرەدى. ونىسىن وليمپيادا ويىندارى كەزىندە بۇكىل الەمگە پاش ەتكەن ەدى.
شۆەتسيادا تۇرمىستىق قالدىقتاردىڭ 99 پايىزى كادەگە جاراتىلادى. تۇرعىندار بۇل ماسەلەگە ۇلكەن جاۋاپكەرشىلىكپەن قارايدى. قاعاز، پلاستيك، مەتالل، شىنى دەگەننىڭ ءبارىن بولەك-بولەك تاستايدى. مۇندا قالدىقتاردىڭ جارتىسى قايتا وڭدەۋگە جىبەرىلەدى. ەندى قالعان جارتىسى ورتەلىپ، ودان الىنعان گاز ۇيلەردى جىلىتۋعا جاراتىلادى. قوقىستىڭ تەك 0,8 پايىزى عانا پوليگونعا تۇسەدى. كەرەك دەسەڭىز، كورولدىك قوقىستى وزگە ەلدەردەن ساتىپ الادى. ويتكەنى جەرگىلىكتى زاۋىتتاردا ورتەۋگە قاجەتتى شيكىزات جەتپەيدى.
ءسويتىپ قالدىقتار نورۆەگيا، ۇلى بريتانيا، يتاليادان اكەلىنەدى. وسىلايشا بىرىنشىدەن، شۆەتسيا ارزان ەنەرگيا كوزىن الادى. ەكىنشىدەن، قوقىستى كادەگە جاراتۋدان پايدا كورەدى.
گەرمانيا قوقىس ساتىپ پايدا تابادى
2022-جىلى گەرمانيا ەۋرووداق بويىنشا ءوز اۋماعىنان سىرتقا ەڭ كوپ قوقىس شىعارعان مەملەكەتكە اينالدى. 735 مىڭ توننا پلاستيكتىڭ كوپ بولىگى نيدەرلاند، تۇركيا مەن پولشاعا جىبەرىلگەن. نەگىزى نەمىس ەلى قالدىقتاردى كادەگە جاراتۋ بويىنشا ۇزدىكتەردىڭ ءبىرى سانالادى. مۇندا ونىڭ تورتتەن ءۇش بولىگى قايتا وڭدەلەدى.
ەسكى جايھاز سەكىلدى ءىرى قوقىستى كونتەينەرگە تاستاۋعا، نە ءۇيدىڭ جانىندا قالدىرىپ كەتە بەرۋگە بولمايدى. ول ءۇشىن ايىپپۇل قاراستىرىلعان. مۇنداي زاتتاردى پوليگونعا اپارىپ تاستاۋ كەرەك. نە ارنايى قىزمەتتى شاقىرتۋ قاجەت. ال ەگەر ەرەجەنى بۇزعان ادامنىڭ كىم ەكەنى انىقتالماسا، وندا قوقىستى شىعارۋ شىعىندارى سول ءۇيدىڭ بۇكىل تۇرعىندارىنىڭ موينىنا ارتىلادى.
جاپونيا قوقىستان التىن وندىرەدى
جاپونيادا قالدىقتاردىڭ 46 پايىزى قايتا وڭدەلەدى. كۇنشىعىس ەلى مۇنىڭ قانشالىقتى ءتيىمدى ەكەنىن توكيوداعى وليمپيادا ويىندارى كەزىندە كورسەتتى. ونداعى مەدالدار ەلەكتروندى قۇرىلعىلاردى قايتا وڭدەۋ ارقىلى جاسالعان. بۇعان بۇكىل تۇرعىندار اتسالىسىپ، 79 توننا ەسكى گادجەت جيناعان. ءبىر ۇيالى تەلەفوندا شامامەن 0,034 گرام التىن، 0,35 گرام كۇمىس، 16 گرام مىس بولادى. ال وليمپيادا قالاشىعىنداعى 18 مىڭ توسەكتىڭ ءبارى قايتا وڭدەلگەن كارتوننان جاسالدى. الاۋ الىپ جۇرەتىن سپورتشىلاردىڭ كيىمىن ءوندىرۋدىڭ وزىنە پلاستيك شولمەكتەر قولدانىلعان.
اۆتورى: جۇلدىز اتاگەلديەۆا
