شەتەلدەگى ۇزدىك قازاق ءتىلدى ب ا ق انىقتالدى

كونكۋرسقا شەتەلدەگى ب ا ق- تا رەسمي جۇمىس ىستەيتىن قازاق جۋرناليستەرى مەن شەتەلدە تىركەلگەن قازاق ءتىلدى باسىلىمدار قاتىستى. وتىنىمدەر 13-29 -قازان ارالىعىندا ونلاين فورماتتا قابىلداندى. «ۇزدىك ب ا ق»، «ۇزدىك جۋرناليست»، «ۇزدىك جاس جۋرناليست» نوميناتسيالارىنا 20-عا جۋىق ءوتىنىم تۇسكەن.

جۇمىستاردى Turkistan, Aiqyn, EgemenQazaqstan, AstanaAqshamy جانە «مەديا دامىتۋ قورى» كورپوراتيۆتىك قورىنىڭ وكىلدەرىنەن تۇراتىن قازىلار القاسى باعالادى.

قازىلار القاسىنىڭ شەشىمىمەن جەڭىمپاز اتانعاندار:

«ۇزدىك ب ا ق» - بايان-ولگي ايماقتىق بۇقارالىق قازاق راديوسى (موڭعوليا). 60 جىلدىق تاريحى بار راديو 2025 -جىلى «بايان-ولگي ايماعىنىڭ ۇزدىك مەكەمەسى» سىيلىعىن العان.

«ۇزدىك جۋرناليست» - جۇلدىز جۇماعۇل قىزى (موڭعوليا). بايان- ولگي ايماعىنداعى قازاق تىلىندە حابار تاراتاتىن «دەربەس» تەلەارناسىنىڭ جۋرناليسى.

«ۇزدىك جاس جۋرناليست» - بەكبولات مۇحتاروۆ (وزبەكستان). ەڭبەك جولىن 2021 -جىلى «نۇرلى جول» گازەتىندە ءتىلشى بولىپ باستادى، 2024 -جىلى «ۇلت.kz» اقپاراتتىق پورتالىندا ەڭبەك ەتتى. 2026 -جىلدىڭ اقپانىنان بەرى قايتادان «نۇرلى جول» گازەتىنىڭ ءتىلشىسى.

جەڭىمپاز جۇلدىز جۇماعۇل قىزى جۋرناليستيكا سالاسىندا 15 جىلدان بەرى قىزمەت ەتىپ كەلەدى. ول بايقاۋ جونىندە ءوز پىكىرىن بىلدىرە كەتتى.

— ەڭ الدىمەن، شەتەلدەگى قازاق ءتىلدى اقپارات قۇرالدارىنىڭ وكىلدەرىنە قولداۋ كورسەتىپ، ولاردىڭ ەڭبەگىن ەلەپ-ەسكەرىپ، كاسىبي قىزمەتىنە لايىقتى باعاسىن بەرىپ وتىرعان «وتانداستار» قورىنا شىنايى العىسىمدى بىلدىرگىم كەلەدى. مەن موڭعوليانىڭ بايان-ولگي ايماعىنداعى دەربەس تەلەارناسىندا جۋرناليستيكا سالاسىندا 15 جىلدان بەرى قىزمەت ىستەپ كەلەمىن.

ءبىزدىڭ تەلەارنانىڭ نەگىزگى ماقساتى، موڭعوليادا ءومىر ءسۇرىپ جاتقان قازاق اعايىندارعا انا تىلىندە اقپارات تاراتۋ، تۋعان ءتىلىنىڭ قادىر- قاسيەتىن ساقتاۋعا، ۇلتتىق بولمىسى مەن رۋحاني قۇندىلىقتارىن ۇمىتپاۋعا ءوز ۇلەسىن قوسۋ. ويتكەنى ءتىل - ۇلتتىڭ جانى، حالىقتىڭ رۋحاني تىرەگى. ال سول تىلىمىزدە اقپارات الىپ، جاڭالىقپەن سۋسىنداۋ - ءاربىر قازاق ءۇشىن ۇلكەن مۇمكىندىك ءارى قاجەتتىلىك، - دەيدى ول.

دەربەس تەلەارناسى تەك جاڭالىقتار تاراتۋمەن شەكتەلمەيدى. ءبىز كورەرمەندەرىمىزگە رۋحاني-تانىمدىق باعدارلامالار، ەركىن سۇحباتتار، اعارتۋشىلىق باعىتتاعى حابارلار ۇسىنىپ، ءبىلىم، مادەنيەت، تاربيە جانە دەنساۋلىق تاقىرىپتارىن دا كەڭىنەن قامتۋعا تىرىسامىز.

جۇلدىز جۇماعۇل قىزى قازاق تىلىندەگى ءاربىر ەفير، ءاربىر باعدارلاما، ءاربىر جاڭالىق-ۇرپاقتار اراسىنداعى تىلدىك بايلانىستى جالعاپ تۇرعان التىن كوپىر ەكەنىن اتاپ ءوتتى.

— بۇگىنگى ۇرپاق ءوز انا تىلىندە سويلەپ، وقىپ، اقپارات الىپ وسسە، ەرتەڭگى كۇنى دە ۇلتتىق بولمىسىمىزدىڭ ساقتالاتىنىنا سەنەمىز. مۇنداي قولداۋ مەن ماراپات ءبىزدىڭ كۇندەلىكتى ەڭبەگىمىزگە بەرىلگەن باعا عانا ەمەس، شەتەلدەگى قازاق جۋرناليستيكاسىنا كورسەتىلگەن قۇرمەت پەن سەنىمنىڭ بەلگىسى. قازاقستان مەن موڭعوليا اراسىنداعى دوستىق پەن ىنتىماقتاستىق قارىم-قاتىناستىڭ نىعايا تۇسۋىنە تىلەكتەسپىن، — دەيدى جۇلدىز جۇماعۇل قىزى.

جەڭىمپازدار 13-16-قاراشا شىمكەنت جانە تۇركىستان قالالارىندا وتەتىن «كيەلى قازاقستان» جوباسى بارىسىندا ماراپاتتالادى. ءار نوميناتسيا جەڭىمپازىنا باعالى سىيلىق تابىستالادى.