شەرزات پولات سوتى: پروكۋرور وقيعانىڭ تولىق حرونولوگياسىن باياندادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا 16 جاستاعى شەرزات پولاتتىڭ ولىمىنە بايلانىستى سوت وتىرىسى ءوتتى.

سوت وتىرىسىندا پروكۋرور 2024 -جىلى 3- قازاننان 4-ىنە قاراعان ءتۇنى بولعان وقيعانىڭ حرونولوگياسىن ايتىپ، 9 سوتتالۋشى - ابزال شىناسىل، راۆيل ساكيەۆ، شىڭعىس بەلعوجايەۆ، دارحان اسكەنتاي، نۇربول توقتاۋبايەۆ، نۇرقياس ءىلياسوۆ، ازامات توقتاۋبايەۆ، ديدار قالياحمەت، دۋمان ىسقاققا قانداي ايىپ تاعىلعانىن باياندادى.

مەملەكەتتىك ايىپتاۋشىنىڭ بايانداماسىنا سايكەس وقيعا حرونولوگياسى كەلەسىدەي بولعان:

2024 -جىلى 3-قازان ساعات 23:22. د. اسكەنتاي ماساڭ كۇيدە بولا تۇرا تالعار قالاسى مەندەلەيەۆ كوشەسى، 13- مەكەنجايىندا ورنالاسقان «قاماجاي» دۇكەنىنە كىرىپ، 3 بوتەلكە سىرا جانە 4 دانا تەمەكى الىپ، ءوزىنىڭ تانىسى كامەلەتكە تولماعان اسكەربەككە WhatsApp مەسسەندجەرى ارقىلى تولەم جاساۋ ءۇشىن حابارلاسىپ، دۇكەن سورەسىندە جازىلىپ تۇرعان نومەرگە 1 مىڭ تەڭگە اۋدارۋدى وتىنگەن. ال اسكەربەك ءوز كەزەگىندە اپاسىنىڭ ەسەپشوتىنان 1 تەڭگە اۋدارىپ، ەلەكتروندى چەكتى اسكەنتايدىڭ WhatsApp مەسسەندجەرىنە جىبەرگەن. سودان كەيىن اسكەنتاي ساتۋشى نۇرىموۆقا ەلەكتروندى چەكتى كورسەتىپ، سونىمەن قوسا قولما-قول 1 مىڭ تەڭگە بەرگەن. 530 تەڭگە قالدىق اقشاسىن العاننان كەيىن اسكەنتاي دۇكەننەن شىعىپ كەتكەن.

ساعات 23:33. دۇكەنگە شەرزات پولات كىرىپ، ءوز تەلەفونىن قۋاتتاعىشقا قويىپ، سوندا وتىرعان.

ساعات 23:47. اسكەنتاي دۇكەنگە قايتا كىرىپ، تەلەفونىن قۋاتتاعىشقا قويۋدى وتىنگەن. ودان كەيىن دالاعا شىعىپ سىرا ءىشۋىن جالعاستىرعان. ش. پولات اسكەنتايدىڭ ءىس-ارەكەتىن مۇقيات باقىلاعان.

ساعات 23:52. كامەلەتكە تولماعان پولات ءوزىنىڭ اكەسىنە قاتىستى بالاعات سوزدەر ايتتى دەگەن سەبەپپەن اسكەنتايدى ەكى رەت ۇرعان. ءمان-جايدى دۇكەن ىشىنەن باقىلاپ تۇرعان نۇرىموۆ بالاسىنا ەسكەرتۋ جاساپ، دۇكەننەن سۋ الىپ، قاندى جۋۋعا كومەكتەسىپ، بالاسىنىڭ ارەكەتى ءۇشىن كەشىرىم سۇراعان جانە دەنساۋلىعىنا كەلگەن زاقىمدى وتەپ بەرەتىنىن جەتكىزگەن. الايدا اسكەنتاي بۇل سوزگە قۇلاق اسپاي ءوزىنىڭ تانىسى ن. توقتاۋبايەۆتى دۇكەنگە حابارلاسىپ شاقىرعان.

ساعات 00:06. تالعار قالاسىندا كافەدە دەمالىپ وتىرعان ن. توقتاۋبايەۆ تانىسى ىسقاقتى الىپ، سونىڭ كولىگىمەن «قاماجاي» دۇكەنىنىڭ الدىنا كەلىپ، اسكەنتايدان ءمان-جايدى سۇراستىرعان. ءوز كەزەگىندە ق. نۇرىموۆ د. اسكەنتايدىڭ ادام شاقىرىپ جاتقانىن كورىپ، ورىن العان جاعدايدى شيەلەنىستىرمەي شەشۋ ءۇشىن تۋعان ءىنىسى عايىپبايەۆتى شاقىرعان.

عايىپبايەۆ دۇكەنگە كولىگىمەن جالعىز ءوزى كەلگەن. ءارى قاراي دۇكەن الدىندا تۇرعان اسكەنتاي مەن توقتاۋبايەۆ عايىپبايەۆقا ءوز نارازىلىقتارىن ايتقان. عايىپبايەۆ ءىنىسى پولات 16 جاستا ەكەنىن، بالالىقپەن كوپ نارسە تۇسىنبەي اسكەنتايدى ۇرىپ جىبەرگەنىن ايتىپ، ونىڭ ارەكەتتەرى ءۇشىن ءوزى كەشىرىم سۇراعان. سونىمەن قاتار ءمان-جايدى تولىق بىلمەي اسكەنتايدىڭ ءوزىن كىنالاپ، 1,5 مىڭ تەڭگە تولەمەي كەتكەنىن ايتقان. توقتاۋبايەۆ اسكەنتايدىڭ كىناسىن ءتۇسىنىپ، ىسقاقتىڭ باسقارۋىنداعى كولىكپەن اسكەنتايمەن بىرگە كەتىپ قالعان.

جولدا اسكەنتاي 1 مىڭ تەڭگە تولەم جاسالعانىن ايتىپ، ەلەكتروندى چەكتى كورسەتكەن. توقتاۋبايەۆ اقشا تولەنگەنىنە كوزى جەتىپ، «قاماجاي» دۇكەنىنە قايتا كەلگەن. ءارى قاراي توقتاۋبايەۆ ساتۋشى نۇرىموۆتان سوڭعى تولەمدەردى كورسەتۋدى تالاپ ەتكەن. نۇرىموۆ سۆەتلانا ەسەبىنەن تەك 1 مىڭ تەڭگە تۇسكەنىن كورسەتكەن. سول جەردە توقتاۋبايەۆ دوسى اسكەنتايدىڭ تولەمەي كەتتى دەگەن اقشاسىن، ياعني 1,5 مىڭ تەڭگەنى اۋدارعان. وسى ۋاقىتتا نۇرىموۆ دۇكەن الدىندا تۇرعان اسكەنتايدىڭ ارەكەتىنە اشۋلانىپ، وعان كاسسادا تۇرعان اسحانا پىشاعىن الىپ ۇمتىلعان. الايدا پولات اكەسىنىڭ الدىنان شىعىپ، ونى سابىرعا كەلتىرىپ، دۇكەنگە قايتا كىرگىزىپ جىبەرگەن.

وسى ۋاقىتتا نۇربول توقتاۋبايەۆ ءوزىنىڭ باۋىرى ازامات توقتاۋبايەۆ جانە تانىستارى ابزال شىناسىل، راۆيل ساكيەۆ، شىڭعىس بەلعوجايەۆ، نۇرقياس ءىلياسوۆ كافەدە وتىرعانىن ءبىلىپ، ولاردى اتالعان دۇكەنگە شاقىرعان. ءوز كەزەگىندە بەلعوجايەۆ، شىناسىل، ساكيەۆ، ءىلياسوۆ جانە توقتاۋبايەۆ الدىن الا ءسوز بايلاسىپ، پىشاقتاردى دايىنداپ، ماساڭ كۇيدە «قاماجاي» دۇكەنىنە بەلعوجايەۆتىڭ باسقارۋىنداعى كولىكپەن بەت العان. ولارمەن بىرگە قىزدار نۇربەكوۆا مەن جاقسىگەلدى دە بولعان. شىناسىل تانىسى اشىربايەۆتىڭ كولىگىمەن ولاردىڭ ارتىنان ءجۇرىپ وتىرعان.

ساعات 00:34. ش. پولات شاقىرتۋىمەن ونىڭ دوستارى «قاماجاي» دۇكەنىنىڭ الدىندا جالدامالى كولىكپەن كەلگەن. سول ارادا سىرا ساتىپ الۋ ءۇشىن قالياحمەت، ءابدىرقادىر جانە مۇراتوۆ دۇكەنگە كىرگەن.

ساعات 00:38. «قاماجاي» دۇكەنىنىڭ الدىندا بەلعوجايەۆ كولىگىمەن ساكيەۆ، ءىلياسوۆ، ا. توقتاۋبايەۆ جانە قىزدار نۇربەكوۆا مەن جاقسىگەلدى كەلگەن. ولاردىڭ ارتىنان شىناسىل جەتكەن. ونى جەتكىزىپ تاستاعان اشىربايەۆ وقيعا ورنىنان كەتىپ قالعان.

وسى ۋاقىتتا دۇكەن الدىندا ش. پولات، ونىڭ اعاسى ن. عايىپبايەۆ جانە دوستارى تۇرعان. ەكىنشى جاقتان ن. توقتاۋبايەۆ، اسكەنتاي، ىسقاق تۇرعان. ال شەرزاتتىڭ اكەسى نۇرىموۆ دۇكەنگە كىرىپ-شىعىپ جۇرگەن. دۇكەن ىشىندە قالياحمەت بولعان.

ا. شىناسىل ءبىرىنشى بولىپ شەرزاتتىڭ كامەلەتكە تولماعان دوسىن ۇرعان. توبەلەس باستالعانىن تۇسىنگەن ش. پولات جاقتاستارى وقيعا ورنىنان قاشىپ كەتكەن.

وسى ۋاقىتتا نۇرىموۆ ايقاي-شۋدى ەستىپ، كاسسادان پىشاق الىپ، دۇكەن الدىنا شىققان. سول ساتتە قالياحمەت نۇرىموۆتى قولىنان ۇستاپ العان. ال بەلعوجايەۆ دۇكەن ەسىگىن اياقپەن تەۋىپ، ونى قايتا كىرگىزىپ جىبەرگەن. دۇكەننىڭ سولتۇستىك-باتىس تۇسىنداعى اعاش جانىنان 16 كاليبرلى اڭشىلىق مىلتىقتى ۇستاعان تۇلعا اسكەنتاي جاقتاستارى تۇرعان جاققا اتقان. وق ادامدارعا تيمەگەن.

ساعات 00:42. وقيعا ورنىنا شەرزاتتىڭ اناسى بيشيمبيەۆا مەن اجەسى كاديروۆا جالدامالى كولىكپەن كەلگەن. ال توبەلەس كەزىندە شىناسىل وزىمەن الدىن الا الىپ كەلگەن اس پىشاعىن پايدالانىپ، پولات پەن عايىپبايەۆتى ولتىرۋگە بەكىنگەن. ول كامەلەتكە تولماعان ش. پولاتتىڭ سول جاق جۇرەك تۇسىنا اس پىشاعىن سۇعىپ العان.

وسى ۋاقىتتا ساكيەۆ عايىپبايەۆقا بوتەلكە لاقتىرىپ (تيمەگەن)، كەيىن وعان سوققى جاساعان. قالياحمەت تە جابىرلەنۋشىنىڭ اعاسىن ۇرۋعا تىرىسقان. ا. توقتاۋبايەۆ پەن ن. ءىلياسوۆ تا وعان بىرنەشە رەت پىشاق سىلتەپ، ءبىراق تيگىزە الماعان. دۇكەن ىشىنەن شىعۋعا تىرىسقان نۇرىموۆتى سوتتالۋشىلاردىڭ ءبىرى بوتەلكەمەن بەتىنەن ۇرعان.

دۇكەنگە قاراي بارا جاتقان شەرزاتتىڭ اجەسى كاديروۆانى شىناسىل يتەرىپ قۇلاتقان. سودان كەيىن بالاسىنا قاراي بارا جاتقان بيشيمبييەۆانى شىناسىل مەن ءىلياسوۆ قولىنان ۇستاپ، جىبەرمەي قويعان.

سول كەزدەرى عايىپبايەۆ ءىنىسىنىڭ «نۇرقانات اعا، ماعان بىردەڭە سۇعىپ الدى» دەگەن داۋسىن ەستىپ، وعان بارعان جانە دەنە جاراقاتىن كورىپ «سكورىي» دەپ كومەككە شاقىرعان.

سول كەزدە بيشيبيەۆا وزىنە بالاسىنا بارىپ، ونى وتىرعان جەرىنەن قۇشاقتاعان. بەلعوجايەۆ وعان قاراماستان پولاتتى باسىنان تەۋىپ، باكى پىشاعىنىڭ سابىمەن بىرنەشە رەت ۇرعان. ءىلياسوۆ جەردە جاتقان اڭشىلىق مىلتىقتى الىپ، ونىڭ سابىمەن پولاتتى ۇرامىن دەپ جاس ءوسپىرىمنىڭ اناسىنا سوققى جاساعان. ونىمەن شەكتەلمەي اسكەنتاي، بەلعوجايەۆ، توقتاۋبايەۆ، ساكيەۆ، ءىلياسوۆ قول-اياقتارىمەن جەردە جاتقان عايىپبايەۆ پەن پولاتتى ۇرىپ-سوققان.

ساعات 01:02- 01:04. شىناسىل عايىپبايەۆتى ءولتىرۋ ءۇشىن ونىڭ جامباس تۇسىنا پىشاق سۇعىپ العان. سول ساتتە ساكيەۆ عايىپبايەۆتىڭ وڭ جاق جامباس تۇسىنا ەكى رەت پىشاق سۇققان. بۇل ارەكەتتەردىڭ سالدارىنان عايىپبايەۆ ەسىنەن تانىپ قالعان. مۇنى كورگەن شىناسىل مەن ساكيەۆ ونى ولتىردىك دەپ ويلاعان.

توبەلەس كەزىندە عايىپبايەۆتىڭ تەلەفونى جەرگە ءتۇسىپ قالعان. قۇنى 220 مىڭ تەڭگە تۇراتىن تەلەفوندى ا. توقتاۋبايەۆ جىمقىرىپ كەتكەن. وسى وقيعالاردان كەيىن توبەلەسكە قاتىسۋشىلار وقيعا ورنىنان كولىككە ءمىنىپ كەتىپ قالعان. ىسقاق ءوز كولىگىمەن ولاردىڭ ارتىنان ەرىپ كەتكەن.

ال نۇرىموۆ ءوز كولىگىنە بالاسى مەن ءىنىسىن سالىپ، ولاردى تالعار اۋداندىق اۋرۋحاناسىنا جەتكىزگەن.

4-قازان تاڭى. ىسقاق الەۋمەتتىك جەلىدەن «قاماجاي» دۇكەنى ماڭىندا بولعان توبەلەستەن ش. پولات قايتىس بولعانىن بىلسە دە، قىلمىس تۋرالى قۇزىرلى ورگاندارعا حابارلاماعان.

پروكۋرور سوتتالۋشىلاردىڭ ءارقايسىسىنا ق ر قىلمىستىق كودەكستىڭ قاي باپتارى بويىنشا ايىپ تاعىلعانىن اتاپ ءوتتى.

- ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 1,4,7, 9,14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)؛

- راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 7,9-تارماقتارى (ادام ءولتىرۋ)؛

- شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق).

- كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.

ەسكە سالايىق، بىلتىر 4- قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

كەيىن اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

2024 -جىلدىڭ 12- قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات پولاتتىڭ اعاسى ءولى تابىلدى.

بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.

اۆتور

دوسبول اتاجان