شەرزات سوتى: ايىپتالۋشىلاردىڭ كوپشىلىگى كىنانى مويىنداعان جوق

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا 16 جاستاعى شەرزات پولاتتىڭ ولىمىنە بايلانىستى باستى سوت وتىرىسى ءوتتى.

سوت وتىرىسى بارىسىندا سۋديا ەرجان جانۇزاقوۆ 9 سوتتالۋشىدان ايىپتاۋ اكتىسىندەگى تاعىلعان ايىپ بويىنشا كىنانى مويىندايتىن نە مويىندامايتىنىن سۇرادى.

شەرزات پولات ولىمىنە بايلانىستى باس كۇدىكتى ا. شىناسىل كىناسىن جارتىلاي مويىندايتىنىن ايتتى. ول ن. عايىپبايەۆقا قاتىستى ءىس-ارەكەتتەرىن راستادى. الايدا ش. پولاتقا پىشاق سۇققانىن جوققا شىعاردى.

بەلعوجايەۆ كىناسىن جارتىلاي مويىندايتىنىن ايتتى. ونىڭ سوزىنشە، سوتتالۋشى جاس ءوسپىرىمدى پىشاق سابىمەن ۇرماعان.

ا. توقتاۋبايەۆ پەن ن. توقتاۋبايەۆ تا كىنالارىن تەك جارتىلاي مويىندايتىندارىن حابارلادى.

ر. ساكيەۆ، د. اسكەنتاي، ن. ءىلياسوۆ، د. قالياحمەت، د. ىسقاق كىناسىن تولىق مويىنداعان جوق.

ەسكە سالايىق، پروكۋرور سوت وتىرىسىندا ولاردىڭ ءارقايسىسىنا قىلمىستىق كودەكستىڭ قاي باپتارى بويىنشا ايىپ تاعىلعانىن وقىدى.

ولار:

— ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 1,4,7, 9,14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)؛

— راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 7,9-تارماقتارى (ادام ءولتىرۋ)؛

— شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق).

— كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.

بۇعان دەيىن سوتتا شەرزات ءولىمىنىڭ نەگىزگى سەبەبى اتالدى.

سونداي- اق نۇرقانات عايىپبايەۆتىڭ جانجال بارىسىندا قانداي جاراقات العانى ايتىلدى.

اۆتور

دوسبول اتاجان