شەرزات ءىسى: سوتتا دۇكەن كامەراسىنا تۇسكەن وقيعانىڭ تولىق بەينەجازباسى كورسەتىلدى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

سوتتا «قاماجاي» دۇكەنىنىڭ بەينەكامەرالارى ءتۇسىرىپ العان وقيعانىڭ تولىق بەينەجازباسى كورسەتىلدى. بەينەجازبا بويىنشا مەملەكەتتىك ايىپتاۋشى، جابىرلەنۋشىلەردىڭ قورعاۋشىلارى جانە سوتتالۋشىلاردىڭ ادۆوكاتتارى سوتقا ءوز ەسكەرتپەلەرىن ايتتى.

بەينەجازبادا دارحان اسكەنتايدىڭ دۇكەنگە كەلگەن ساتىنەن باستاپ جانجال اياقتالعان سوڭ، قارجاۋباي نۇرىموۆتىڭ كولىككە وتىرعانعا دەيىنگى ءسات بەينەكامەرا راكۋرسى بويىنشا كورسەتىلگەن.

سۋديا ەرجان جانۇزاقوۆ بەينەجازبا كورسەتىلگەننەن كەيىن ءۇزىلىس جاريالادى. كەلەسى سوت وتىرىسى 15 -مامىر كۇنى ساعات 10:00-دە وتەدى.

ەسكە سالايىق، بۇگىن سوتتا ايىپتالۋشى دارحان اسكەنتايدان جاۋاپ الىندى.

سوتتالۋشى وزىنە تاعىلعان ايىپپەن تاعى دا كەلىسپەدى.

سوتتالۋشىلاردىڭ ادۆوكاتتارى پروكۋروردى اۋىستىرۋدى ءوتىندى.

سوت پروكۋروردى اۋىستىرۋدان باس تارتتى.

بىلتىر 4 قازان كۇنى توبەلەستەن 16 جاستاعى ءجاسوپىرىم قايتىس بولعانىن جازعان ەدىك.

اۆتور

دوسبول اتاجان