شەرزات ءىسى: سۋدياعا جاريالانعان قارسىلىق قابىلدانبادى

تالدىقورعان. KAZINFORM - شەرزات پولاتتىڭ ولىمىنە قاتىستى قىلمىستىق ءىس بويىنشا سوت وتىرىسى جالعاسىپ جاتىر.

سوت وتىرىسى ۇزىلىستەن كەيىن قىلمىستىق-پروتسەستىك كودەكستىڭ 87-بابى 11-بولىگىنە سايكەس سۋدياعا قارسى جاريالانعان قارسىلىقتى سۋديا اسقار بەيىمبەتوۆ قارادى.

سوت بارىسىندا قورعاۋشى جۇمات ابەنوۆ تەرگەۋشى مەن ساراپشىلاردى سوت وتىرىسىنا شاقىرۋ جونىندە ءوتىنىش ءبىلدىرىپ، سوتتالۋشى ابزال شىناسىلعا قاتىستى كەيبىر ايعاق ءبىر-بىرىنە سايكەس كەلمەيتىنىن العا تارتقان.

- ءىس ماتەريالدارىندا ونىڭ ۇستىندەگى كيىم قارا ءتۇستى دەپ كورسەتىلگەن، الايدا ول كەزدە ابزالدىڭ ۇستىندە قارا-كوك ءتۇستى كيىم بولعان. سوندىقتان مەن تەرگەۋشى مەن ساراپشىلاردى سوتقا شاقىرۋعا نەگىز بار دەپ ەسەپتەيمىن، - دەدى ادۆوكات.

سۋديا سوت وتىرىسىنا قاتىسۋشىلاردىڭ پىكىرلەرىن تىڭداعان سوڭ، قورعاۋشى جۇمات ابەنوۆتىڭ ىسكە ءتوراعالىق ەتۋشى سۋديا ەرجان جانۇزاقوۆقا جاريالاعان قارسىلىعىن نەگىزسىز دەپ تاۋىپ، ءوتىنىشتى قاناعاتتاندىرۋسىز قالدىردى.

ەسكە سالايىق، پروكۋرور سوتتالۋشىلاردىڭ ءارقايسىسىنا ق ر قىلمىستىق كودەكستىڭ قاي باپتارى بويىنشا ايىپ تاعىلعانىن اتاپ ءوتتى.

— ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 1، 4، 7، 9، 14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)؛
— راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 7،9-تارماقتارى (ادام ءولتىرۋ)؛
— شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق).
— كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.

ايتا كەتەيىك، وقيعا بويىنشا مەملەكەتتىك ساراپتاما قورتىندىسى جاريالانعانىن جازعانبىز.

سونداي-اق، شەرزات سوتىندا ايىپتالۋشىلار مەن جابىرلەنۋشىلەردى بەتتەستىرۋ ءساتى كورسەتىلگەن بولاتىن.

اۆتور

تاستان تويانوۆ