شەرزات ءىسى: جابىرلەنۋشى تاراپ ازاماتتىق تالاپ ارىز جاريالادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 16 جاستاعى شەرزات پولاتتىڭ ولىمىنە بايلانىستى قوزعالعان قىلمىستىق ءىس بويىنشا اشىق سوت وتىرىسى جالعاسىپ جاتىر.

سوت بارىسىندا جابىرلەنۋشى تاراپتىڭ وكىلى ادۆوكات مەيىرمان شەكەيەۆ وقيعا ورنىندا بولعان ەلميرا نۇربەكوۆا مەن دانا جاقسىگەلدىگە قاتىستى جەكە قاۋلى شىعارۋدى سۇرادى. سوت ءتوراعاسى ءوتىنىشحاتتى اشىق قالدىرىپ، شەشىمدى كەڭەسۋ بولمەسىندە قابىلدايتىنىن ايتتى.

سونىمەن قاتار قورعاۋشى ازاماتتىق تالاپ ارىز جاريالاپ، كەلەسى وتەماقىلاردى ءوندىرۋدى تالاپ ەتتى:

Фото: Берик Актан

1. شىناسىل ابزالدان - قارجاۋباي نۇرىموۆتىڭ پايداسىنا ۇلىنىڭ جەرلەۋ راسىمىنە كەتكەن 2794000 تەڭگە كولەمىندە ماتەريالدىق شىعىندى ءوندىرۋ؛

2. شىناسىل ابزال جانە راۆيل ساكيەۆتەن ورتاقتاسىپ - قارجاۋباي نۇرىموۆتىڭ پايداسىنا مورالدىق زيان رەتىندە 100 ميلليون تەڭگە كولەمىندە وتەماقى ءوندىرۋ؛

3. شىناسىل ابزال جانە راۆيل ساكيەۆتەن ورتاقتاسىپ - گۇلبارا بيشىمبايەۆانىڭ پايداسىنا مورالدىق زيان ءۇشىن 100 ميلليون تەڭگە ءوندىرۋ؛

4. شىناسىل ابزال جانە راۆيل ساكيەۆتەن ورتاقتاسىپ - جۇمابيكە قاديروۆانىڭ پايداسىنا مورالدىق زيان ءۇشىن 100 ميلليون تەڭگە ءوندىرۋ؛

5. بەلعوجايەۆ شىڭعىس، اسكەنتاي دارحان، يلياسوۆ نۇرقياس، توقتاۋبايەۆ نۇربول، توقتاۋبايەۆ ازامات جانە قالياحمەت ديداردان ۇلەستىك تۇردە - قارجاۋباي نۇرىموۆتىڭ پايداسىنا ءارقايسىنان 20 ميلليون تەڭگەدەن، جالپى 120 ميلليون تەڭگە كولەمىندە مورالدىق زياندى ءوندىرۋ؛

6. وسى التى ازاماتتان گۇلبارا بيشىمبيەۆاعا - ءارقايسىنان 20 ميلليون تەڭگەدەن، جالپى 120 ميلليون تەڭگە كولەمىندە مورالدىق زياندى وتەۋ؛

7. سونداي- اق اتالعان ازاماتتاردان جۇمابيكە قاديروۆاعا - ءارقايسىنان 20 ميلليون تەڭگەدەن، جالپى 120 ميلليون تەڭگە كولەمىندە مورالدىق وتەماقى ءوندىرۋ سۇرالدى.

ادۆوكات مورالدىق زيان بويىنشا تالاپتاردىڭ پسيحولوگيالىق زەرتتەۋ قورىتىندىلارىنا نەگىزدەلگەنىن اتاپ ءوتتى. سونىمەن قاتار جەرلەۋ راسىمىنە جۇمسالعان شىعىنداردىڭ تۇبىرتەكتەرى دە تالاپ ارىزعا قوسىمشا رەتىندە تىركەلدى.

سوت ءتوراعاسى ەرجان جانۇزاقوۆ اتالعان ازاماتتىق تالاپ ارىزدى قابىلدادى. اتاپ ايتقاندا جابەرلەنۋشىلەر نۇرىموۆ، كاديروۆا، بيشىمبيەۆا وسى قىلمىستىق ءىس بويىنشا ازاماتتىق تالاپكەر رەتىندە تانۋعا، سوتتالۋشىلار شىناسىل. ا، ساكيەۆ. ر، بەلعوجايەۆ. ش، اسكەنتاي. د، يلياسوۆ. ن، توقتاۋبايەۆ .ن، , توقتاۋبايەۆ. ا جانە قالياحمەت. د ازاماتىق جاۋاپكەر رەتىندە تانۋعا قاۋلى ەتتى. سونداي-اق سۋديا سوتتالۋشىلاردى ق ر ق پ ك 74-بابىنداعى ازاماتتىق جاۋاپكەردىڭ قۇقىقتارىن ءتۇسىندىردى.

ايتا كەتەيىك، بۇعان دەيىن ايعاق رەتىندە تاركىلەنگەن بەينەجازبا جاريالانعانىن جازعانبىز.

سونىمەن قاتار سۋدياعا جاريالانعان قارسىلىق قابىلدانبادى.

پروكۋرور وقيعانىڭ تولىق حرونولوگياسىن باياندادى.

اۆتور

تاستان تويانوۆ