eGov Mobile قوسىمشاسىندا وتباسىنىڭ ءال-اۋقاتىن باعالاۋ كالكۋلياتورى ىسكە قوسىلدى
eGov Mobile موبيلدى قوسىمشاسىندا وتباسىنىڭ ءال-اۋقاتىن باعالاۋعا ارنالعان جاڭا سەرۆيس پايدا بولدى.
ول 2027 -جىلعى 1 -قاڭتاردان باستاپ كەيبىر مەملەكەتتىك كومەكتەردى وتباسىنىڭ ناقتى جاعدايى مەن مۇقتاجدىعىنا قاراي كورسەتۋ تارتىبىنە كوشۋ اياسىندا ىسكە قوسىلدى.
كالكۋلياتور ارقىلى ازاماتتار وتباسىنىڭ ءال-اۋقاتىن باعالاۋ تالاپتارىمەن تانىسىپ، وتباسىنىڭ سالاماتتىلىق دەڭگەيىن انىقتاي الادى. بۇل رەتتە وتباسىنىڭ تابىسى مەن مۇلكى عانا ەمەس، وتباسى قۇرامى، بالالاردىڭ، قارت ادامداردىڭ جانە مۇگەدەكتىگى بار ادامداردىڭ بولۋى سياقتى الەۋمەتتىك جاعدايلار دا ەسكەرىلەدى. باعالاۋ التى باعىت بويىنشا 59-دان استام كورسەتكىشكە سۇيەنەدى.
ايتا كەتەرلىگى، ەسەپ ادامنىڭ ءوزى ەنگىزگەن مالىمەتتەر نەگىزىندە جۇرگىزىلەدى جانە تەك اقپاراتتىق سيپاتقا يە. كالكۋلياتوردىڭ ناتيجەسى الەۋمەتتىك تولەم تاعايىنداۋ نەمەسە ونى توقتاتۋ تۋرالى شەشىم بولىپ سانالمايدى.
ايتا كەتەلىك اسىراۋشىسىنان ايىرىلعاندارعا تولەم توقتاسا، قانداي كومەك ساقتالاتىنى تۋرالى جازعان ەدىك.
