شۋچەدە جەدەل جاردەم جۇرگىزۋشىسىنە جاسالعان شابۋىل تۋرالى تىڭ دەرەك شىقتى
كوكشەتاۋ. KAZINFORM - شۋچە قالاسىنداعى جانار-جاعار ماي قۇيۋ بەكەتىندە بولعان شابۋىلدان كەيىن جەدەل جاردەم كولىگىنىڭ جۇرگىزۋشىسى بۋراباي كوپسالالى اۋدانارالىق اۋرۋحاناسىنىڭ قابىلداۋ بولمەسىنىڭ كومەگىنە جۇگىندى.
اقمولا وبلىسى دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، 10-اقپاندا ەكى فەلدشەر مەن جۇرگىزۋشىدەن تۇراتىن №2 جەدەل جاردەم بريگاداسى HYUNDAI سانيتارلىق كولىگىمەن شۋچە قالاسىنداعى «گەليوس» جانار-جاعار ماي قۇيۋ بەكەتىنە بارعان.
«جانار-جاعار ماي قۇيۋ كەزىندە جەدەل جاردەم كولىگىنىڭ جۇرگىزۋشىسى مەن رەسەيدە تىركەلگەن مەملەكەتتىك نومىردەگى «Toyota Land Cruiser 200» اۆتوكولىگىنىڭ جۇرگىزۋشىسى اراسىندا جانجال تۋىنداعان. سونىڭ سالدارىنان جەدەل جاردەم كولىگىنىڭ جۇرگىزۋشىسىنە دەنە جاراقاتى كەلتىرىلدى. وقيعادان كەيىن ول مەديتسينالىق كومەك كورسەتۋ جانە ودان ءارى باقىلاۋ ءۇشىن بۋراباي كوپسالالى اۋدانارالىق اۋرۋحاناسىنىڭ قابىلداۋ بولمەسىنىڭ كومەگىنە جۇگىندى، - دەپ ءتۇسىندىردى باسقارمادان.
ايتا كەتسەك، بۇدان بۇرىن شۋچەدە جەدەل جاردەم جۇرگىزۋشىسىنە شابۋىل جاساعان ەر ادام ۇستالعانىن جازعان ەدىك.
اۆتور
اسلان وسپانوۆ
