ۇشاقتاعى جۇك قالاي تەكسەرىلەدى؟
استانا. قازاقپارات - قازاقستان جولاۋشى تاسىمالى عانا ەمەس، اۆياكارگونى دا دامىتىپ جاتىر. ياعني جۇكتى كولىك، پويىزبەن عانا ەمەس، ۇشاقپەن دە كوپتەپ تاسيتىن بولدى. قازىرگىدەي الىس-بەرىس كوبەيگەن ۋاقىتتا تاۋاردىڭ تەز جەتكەنى ءجون. ال تاۋاردى ۇشاق تەز اپارعانمەن، اۋەجاي اۋماعىندا مۇقيات تەكسەرىلەدى.
مۇنداي جاعداي كاسىپكەر ءۇشىن قوسىمشا شىعىن، قوسىمشا ۋاقىت. ەندى حالىقارالىق تاجىريبەگە سۇيەنە وتىرىپ، تاۋاردى اۋەجايعا دەيىن تەكسەرەتىن ۇيىمدار قۇرۋ ماسەلەسى قارالىپ جاتىر. ەلدە اۆياكارگو سالاسى ەندى عانا قانات جايا باستادى. اۆياتسيالىق حابتار قۇرىلىپ، كومپانيالار تاۋاردى ۇشاقپەن جونەلتۋگە كوشتى. دەگەنمەن اۋەجاي اۋماعىندا ءاربىر تاۋار تەكسەرىلەدى. ەرىككەننەن ەمەس، ارينە. قاۋىپسىزدىك ماڭىزدى. ال ۇزىن-سونار كەزەك بولسا، تاۋار قويماعا جىبەرىلەدى. قويما تەگىن ەمەس. سوندىقتان كاسىپكەر ۋاقىتپەن قاتار قوسىمشا قاراجاتىن جوعالتۋى مۇمكىن.
حالىقارالىق تاجىريبەگە سۇيەنسەك، سالادا «بەلگىلى جۇك جەتكىزۋشى» جانە «تىركەلگەن اگەنت» ۇعىمدارى بار. كەي ەلدەردە بۇلار كەڭىنەن قولدانىلادى. ياعني مەملەكەتتىك ورگان تاراپىنان سەرتيفيكاتتالعان ارنايى ۇيىمدار تاۋاردى اۋەجايعا جەتكەنگە دەيىن تەكسەرىستەن وتكىزىپ، بۋىپ-ءتۇيىپ قويادى.
رۇستەم قابانبايەۆ، قازاقستاننىڭ اۆياتسيالىق اكىمشىلىگى اۆياتسيالىق قاۋىپسىزدىك دەپارتامەنتىنىڭ باسقارما باسشىسى:
- سونداي دايىن جۇكتى اۋەجاي اۋماعىندا تەكسەرمەي-اق بىردەن اۋە كەمەسىنە تيەۋگە بولادى. وسى ارقىلى كوپ ۋاقىت ۇتامىز. قاۋىپسىزدىك تە نازاردا بولادى. حالىقارالىق ۇيىمداردىڭ تاجىريبەسىن زەردەلەپ جاتىرمىز. اۋەجايداعى تەكسەرىس مۇلدە جويىلادى دەگەن ءسوز ەمەس. ونى دا دامىتامىز. ءيىسشىل يتتەردەن باستاپ، ساۋلەلى قۇرىلعىلاردى قولدانۋعا دەيىنگى ادىستەمە پىسىقتالادى.
سالاداعى تاعى ءبىر ماڭىزدى ماسەلە - قاقتىعىس ايماقتارىن اينالىپ ءوتۋ. قاۋىپسىز اسپان جونىندەگى حالىقارالىق كونسۋلتاتيۆتىك كوميتەت اۋە رەيستەرىنە تونەتىن قاۋىپ-قاتەردى باعالاۋ جانە ءوزارا اقپارات الماسۋعا جاۋاپتى. ءبىزدىڭ ەل بۇل ۇيىمعا باقىلاۋشى رەتىندە كىرەدى. ءدال وسى سالانى ودان ءارى دامىتىپ، ارىپتەستىكتى نىعايتۋ ءۇشىن ICAO ءتيىستى قۇجاتتى جەتىلدىرۋگە نيەتتى.
ەلدار مۇساتايەۆ، قازاقستاننىڭ اۆياتسيالىق اكىمشىلىگى اۆياتسيالىق قاۋىپسىزدىك دەپارتامەنتىنىڭ اۆياتسيالىق ينسپەكتورى:
- Air Astana مەن SCAT، وسى ەكى كومپانيا شەتەلگە ءجيى ۇشىپ تۇرادى. قاقتىعىس ايماقتارى ولاردىڭ مارشرۋتتارىنا كىرىپ تۇرادى. بۇل ەكى كومپانيانىڭ ريسكتەرىن باقىلاۋ وتە جوعارى دەڭگەيدە. ICAO- نىڭ قۇجاتىنا تەرمينولوگياعا قاتىستى جانە كەيبىر ماڭىزدى انىقتامالارعا ۇسىنىستار بەرىپ جاتىرمىز. ەۋروپا مەن ازيانى جالعاپ تۇرعان ءبىزدىڭ ەل ءۇشىن اۆياكارگو مۇنايمەن تەڭ. سالاداعى ينفراقۇرىلىم ءوز تاۋارىمىزدى جونەلتەتىن عانا ەمەس، وزگە ەلدەردىڭ جۇك ۇشاقتارى ايالدايتىن الاڭعا اينالۋى كەرەك.
بيىل قاڭتار-شىلدە ارالىعىندا وتاندىق اۋەجايلار ارقىلى 102 مىڭ توننا جۇك ءوتتى. بىلتىرعى سايكەس كەزەڭمەن سالىستىرعاندا 10 پايىزعا كوپ. ەندى بۇل كورسەتكىشتى جىلدان جىلعا ارتتىرۋ مىندەتى تۇر.
24.kz
