شاۋەل اپا قارتتار كىتاپ وقۋعا شاقىردى

اق جاۋلىقتى انا كىتاپ وقۋدى رۋحاني ازىق قانا ەمەس، جادىنى جاتتىقتىرىپ، سانانى سەرگەك ۇستاۋدىڭ ءتيىمدى ءتاسىلى دەپ بىلەدى، دەپ حابارلايدى 24KZ.

شاۋەل شۇعان قىزى - 84 جاسقا تاياپ قالسا دا، ولەڭ جازىپ، كىتاپ شىعارىپ جۇرگەن ولكەدەگى قازىنالى قارتتاردىڭ ءبىرى. كيمەشەك تارتقان كەيۋانا قاسىنا كەلىنىن ەرتىپ كىتاپحانانى كوپ جاعالايدى. بۇگىن كەلگەندەردى ءوزىنىڭ ولەڭدەر جانە ەستەلىكتەر جيناعىمەن تانىستىردى. سۋىرىپ سالما اقىندىعى دا بار شاۋەل انا جاستايىنان كىتاپ وقۋعا اۋەس بولىپتى. «سەكسەننىڭ سەڭگىرىنە شىقسام دا، ەستە ساقتاۋ قابىلەتىمنىڭ جاقسى بولۋى سول كىتاپقۇمار قاسيەتىمنىڭ ارقاسى»، - دەيدى.

شاۋەل شۇعان قىزى، زەينەتكەر:

 - اباي اتامىزدىڭ ولەڭدەر كىتابىن كوپ وقىدىم. ۇزاق جاساۋعا سەپتىگىن تيگىزەدى. تەلەفون قاراماي، وقۋشىلار كىتاپقا قاراسا، عۇمىرى ۇزاق بولادى. قابىلەت جاقسارادى، كوپ نارسەنى ۇمىتپايسىڭ. كىتاپتان وقىعان ۇمىتىلمايدى. ال مىنا كورگەنىڭ ۇمىتىلىپ قالادى.

 ورالحان بوكەي اتىنداعى كىتاپحانانىڭ شاۋەل اجەي سياقتى وقىرمانى كوپ. ولار تەك ادەبيەتتەن سۋسىنداپ قانا قايتپاي، وقىعان- توقىعاندارىن ءوزارا تالقىعا سالادى.

نۇرعيزا تاڭارىقوۆا، وقىرماندار كلۋبىنىڭ جەتەكشىسى:

- وسى كەشە عانا كلۋبتاعى قارتتارمەن كەزدەسىپ، اتاقتى سۋرەتشىلەردىڭ ەڭبەگى جايلى وي بولىستىك. جاسىم 76-دا بولسا دا وسى جەردەن ۇلكەن كۇش-قۋات الىپ قايتامىن. وقىعان شىعارمادان وزىمە كەرەگىن جازىپ الىپ، وتىرىستاردا سونى مىسالعا كەلتىرىپ ايتىپ جۇرەمىن.

«قارت وقىرمانداردىڭ تالعامى بيىك»، - دەيدى كىتاپحاناشىلار. ولار كوبىنەسە جاستىق شاعىنداعى اقىن-جازۋشىلاردىڭ تۋىندىلارىن ءجيى سۇرايدى ەكەن.

تاڭنۇر باشاي، كىتاپحاناشى:

- اتاپ ايتار بولساق، «سوڭعى كوش»، «اباي جولى»، «ماحاببات قىزىق مول جىلداردى» وقيتىن ەگدە جاستاعى كىسىلەر بار. ءازىلحان نۇرشايىقوۆتىڭ «ماحاببات قىزىق مول جىلدارى» ول كىسىلەردىڭ جاس ۋاقىتىندا كيگىز كىتاپقا اينالعان كىتاپ، بىرەۋ ءبىر بەتىن وقىپ، ارى قاراي بۇكىل سىنىپ بولىپ وقىعان.

 كىتاپ قۇمار قاريالار وسىلايشا، گادجەتتەن باس المايتىن بۇگىنگى ۇرپاققا ونەگە كورسەتىپ كەلەدى. جالپى مامانداردىڭ ايتۋىنشا، كىتاپحاناعا ايىنا 7 مىڭ وقىرمان باس سۇقسا، سونىڭ 40-50 پايىزى - 60-70 جاستان اسقان قارتتار.