ش ق و شاحتاسىندا قازا تاپقان جۇمىسشىلاردىڭ وتباسىنا بارلىق قاجەتتى كومەك كورسەتىلەدى

وسكەمەن. KAZINFORM - شىعىس قازاقستان وبلىسىنداعى «ەرتىس» شاحتاسىندا كوز جۇمعان 4 ادامنىڭ وتباسىنا بارلىق قاجەتتى كومەك كورسەتىلەدى.

ش ق و اكىمى ەرمەك كوشەربايەۆ «ەرتىس» شاحتاسىندا قازا بولعان جۇمىسشىلاردىڭ وتباسىلارىنا بارىپ، كوڭىل ايتتى. جۇمىسشىلاردىڭ ەكەۋى «شىعىس ءتۇستى مەت» جشس- نىڭ، ەكەۋى مەردىگەر ۇيىمداردىڭ قىزمەتكەرى. تاعى ءبىر زارداپ شەككەن جۇمىسشى اۋرۋحاناعا جاتقىزىلدى.

«مارقۇمداردىڭ وتباسىلارىنا بارلىق قاجەتتى كومەك كورسەتىلەدى. بۇل ءۇشىن وبلىستىق جەدەل شتاب قۇرىلعان. قازىر ارنايى كوميسسيا قايعىلى جاعدايدىڭ ءمان-جايىن انىقتاپ جاتىر»، - دەيدى ءوڭىر باسشىسى ەرمەك كوشەربايەۆ.

ەسكە سالساق، كەشە شىعىس قازاقستان وبلىسىنداعى «ەرتىس» شاحتاسىندا 4 ادام قازا بولعانى حابارلانعان.

اۆتور

تالعاتجان مۇحامەتبەك ۇلى