ديماشتىڭ گونكونگتەگى كونسەرتىنە الەمنىڭ ءار تۇكپىرىنەن جانكۇيەرلەر جينالدى
ديماش قۇدايبەرگەن 23-جەلتوقسان كۇنى گونكونگتا جەكە كونسەرتىن بەردى. قازاقپارات بۇل تۋرالى dimashnews سايتىنا سىلتەمە جاساپ حابارلايدى.
مەرەكە اتاۋلى كۇنگە ارنالعان - وسىدان جەتى جىل بۇرىن 22 جاستاعى قازاقستاندىق مۋزىكانت «I am a Singer» جوباسىنا قاتىسۋ ءۇشىن العاش رەت اسپان استى ەلىنە كەلگەن بولاتىن. جاس ءانشى بايقاۋدىڭ العاشقى تۋرىندا-اق ميللياردتاعان كورەرمەندى باعىندىرىپ قانا قويماي، جوبانىڭ سوڭىنا دەيىن ءساتتى جەتتى، كۇن سايىن جانكۇيەرلەر اۋديتورياسى دا كەڭەيدى. ولاردى جۇرەككە جاقىن ادامدار رەتىندە - Dears دەپ اتادى.
سودان بەرى 7 جىل ءوتتى، ءارتۇرلى ەلدەر مەن كونتينەنتتەردە ديماشتىڭ جانكۇيەرلەرى كوبەيدى.
جاڭا - 2024 -جىل قارساڭىندا ءارتىس 7 جىل بۇرىن ءوزىنىڭ شىعارماشىلىق جولىنا جاڭا لەپ بەرگەن جەرگە قايتا ورالدى. گونكونگ كورمە ورتالىعىنا قىتايدىڭ، ەۋروپانىڭ، امەريكانىڭ، ازيانىڭ جانە افريكانىڭ ءتۇرلى قالالارىنان Dears جينالدى. 2022 -جىلدىڭ قىركۇيەگىندە الماتىدان باستالعان «Stranger» اتتى الەمدىك شوۋ- تۋرنەسى وسى كەشتە دە ەرەكشە ءوتتى.
ديماش قۇدايبەرگەن كونسەرتتى «Golden» انىمەن اشتى. كەيىن كەشتىڭ العاشقى توسىنسىيى - «Smoke» جاڭا كومپوزيتسياسى شىرقالدى.
شوۋدىڭ ەكىنشى ءبولىمى «اve Maria» ۆوكاليزى جانە Dears پرەمەراسىن اسىعا كۇتكەن «When I’ve Got You» جاڭا انىمەن جالعاستى.
ديماش 10 جىل بۇرىن جازعان «ۇمىتىلماس كۇن» ءانى سانجاي المىشيەۆتىڭ سىبىزعىدا سۇيەمەلدەۋىمەن ۇسىنىلدى.
قازاقستاندىق ءانشىنىڭ كوپتەگەن ۇلكەن كونسەرتتەرىندە جۇلدىزدار ارنايى قوناق رەتىندە ونەر كورسەتەدى، وسى كۇنى دە ءداستۇر ساقتالدى. قازاقستاندىق ونەرپازدى قولداۋعا ديماش «I am a Singer» جوباسىنا قاتىسقاننان بەرى تانيتىن تانىمال مۋزىكانت، ءانشى، كومپوزيتور جانە پروديۋسەر دجاستين لو كەلدى. دجاستيننىڭ جەكە ورىنداۋىنان كەيىن ەكەۋى قىتاي تىلىندە «愛是永恆»/» ماحاببات ماڭگىلىك» ءانىن ورىندادى.
كونتسەرتتىڭ ءبىر بلوگى اسپاپتىق نومىرلەردەن باستالدى. الدىمەن تەمىرلان ولجابايەۆ پەن ەرنات ناۋرىز دومبىرادا، ءابىلمانسۇر قۇدايبەرگەن گيتارادا زالعا ەرەكشە اتموسفەرا سىيلادى. ودان ءارى ديماش ءابىلمانسۇردىڭ «Together» اۆتورلىق ءانىن ورىندادى. بۇل تۋىندى الەمدىك چارتتاردا بىرنەشە رەت جۇلدەلى ورىندارعا يە بولعان ەدى.
كەشتىڭ سوڭعى بلوگى رەسەيلىك كومپوزيتور يگور كرۋتويدىڭ «Stranger» كومپوزيتسياسىمەن اشىلدى.
د. قۇدايبەرگەن ءوزىنىڭ دوستارىمەن بىرگە حالىق اسپاپتارىنىڭ دىبىستالۋىنا زاماناۋي مۋزىكالىق ادىستەردىڭ ۇيلەسىم مۇمكىندىگىن پاش ەتىپ، «اداي» كۇيى مەن «ءدۇرداراز» حالىق ءانىن ورىنداپ بەردى.
كونسەرتتىڭ فينالىندا بارلىق جانكۇيەردىڭ جۇرەگىنىن ورىن تاپقان مۋزىكالىق شىعارما - «Autumn strong» شىرقالدى.
«Dears… ءبىز ءبىر- ءبىرىمىزدى كوپتەن بەرى كورمەدىك، مەن سىزدەردى ساحنا ۇستىنەن ۇلكەن، تاتۋ وتباسى ەكەندەرىڭىزدى كورىپ تۇرمىن. قولداۋلارىڭىز ءۇشىن راقمەت. سىزدەر بولماساڭىزدار مەن ەشتەڭەگە قول جەتكىزە الماس ەدىم، بارلىعى سىزدەردىڭ قولداۋىڭىزدىڭ ارقاسىندا. كەلەسى كەزدەسۋدى تاعاتسىزدانا كۇتەمىن»، - دەپ ديماش جانكۇيەرلەرىنە شىن جۇرەكتەن العىس ايتىپ، كونتسەرتتى اياقتادى.
اۆتور
گۇلميرا الياكپاروۆا
