ديماش قۇدايبەرگەن جاڭا ءانىنىڭ پرەمەراسىن جاريالادى

استانا. قازاقپارات - 30- قاڭتاردا بۋداپەشتتە شىعارماشىلىق ساپاردا جۇرگەن ديماش قۇدايبەرگەن جانكۇيەرلەرىنە بەينەۇندەۋ جاسادى. بۇل تۋرالى dimashnews.com جازدى.

Димаш Құдайберген жаңа әннің премьерасын жариялады
Фото: видеодан алынды

- قۇرمەتتى دوستار، مەنىڭ سۇيىكتىلەرىم Dears! بۇگىن 30- قاڭتار - ءبىزدىڭ ورتاق مەرەكەمىز. 2017 -جىلعى سول ءبىر ەستە قالارلىق كۇننەن باستاپ، سىزدەرگە العاش رەت وسىلاي Dears دەپ اتاعانىما بۇگىن 8 جىل تولىپ وتىر. وسى جىلدار ىشىندە ءبىز كونسەرتتىك تۋرلارىممەن قازاقستاننان باستاپ ازيا، امەريكا، ەۋروپاعا دەيىنگى كوپتەگەن قالا مەن ەلدەردى ارالادىق… سىزدەردىڭ ەرەكشە ىقىلاستارىڭىز بەن قولداۋلارىڭىز ءۇشىن، مەنىڭ شىعارماشىلىعىما قىزىعۋشىلىق تانىتىپ، ماعان سەنىم ارتقاندارىڭىز ءۇشىن سىزدەرگە ايتار العىسىم شەكسىز. بۇگىنگى تۋعان كۇنىمىزبەن شىن جۇرەكتەن قۇتتىقتايمىن! سىزدەردى جاڭا كونسەرتتەر مەن قويىلىمداردا اسىعا كۇتەمىن، - دەدى ءانشى.

ديماش قۇدايبەرگەن جاقىندا جاڭا تۋىندىسى جارىققا شىعاتىنىن مالىمدەدى.

- بۇگىن وسى مەرەكەگە وراي جاڭا ءانىمىزدىڭ پرەمەراسىن جاساماقپىز. 7 -ناۋرىزدا الەمگە ايگىلى كومپوزيتور جانە پروديۋسەر ۆالتەر افاناسيەۆتىڭ جەتەكشىلىگىمەن حالىقارالىق اۆتورلار ۇجىمى جاساعان تۋىندىنى جارىققا شىعارامىز. بۇل - «Love’s not over yet» ءانى. سىزدەرگە ۇنايدى دەگەن ۇمىتتەمىن! - دەدى.

«Love’s not over yet» ءانى - ديماش قۇدايبەرگەننىڭ ورىنداۋىنداعى تۋىندى. بۇل تۋىندىنى ەكى مارتە گرەممي سىيلىعىنىڭ يەگەرى اتانعان پروديۋسەر جانە كومپوزيتور ۆالتەر افاناسيەۆ باستاعان حالىقارالىق توپ جازعان بولاتىن. ءاندى ديماشتىڭ ەرەكشە داۋىسىنا ارناپ ۋولتەر افاناسەفف، دومينيك بۋس، فلاۆيەن كومپانون سياقتى كومپوزيتورلار جانە ءسوزىن ديەۆون گرەيۆس جازدى.ديماش قۇدايبەرگەن، پلاسيدو دومينگو، حوسە كاررەراس «Virtuosos» حالىقارالىق جوباسىندا قازىلىق ەتەتىنىن جازعان بولاتىنبىز.

اۆتور

ەلميرا ورالبايەۆا

سوڭعى جاڭالىقتار