ديماش قۇدايبەرگەن حالىقارالىق كوشى-قون ۇيىمىنىڭ ىزگى نيەت ەلشىسى اتاندى
استانا. KAZINFORM - الەمگە ايگىلى ءانشى ءارى كومپوزيتور ديماش قۇدايبەرگەن حالىقارالىق كوشى-قون ۇيىمىنىڭ (ح ك ۇ) ىزگى نيەت ەلشىلەرىنىڭ قاتارىنا قوسىلدى.
ح ك ۇ بۇگىن ارتىستەر، سۋرەتشى، سپورتشى جانە باسقا دا بەلگىلى تۇلعالاردان تۇراتىن توعىز ىزگى نيەت ەلشىسى تاعايىندالعانىن حابارلادى. وتكەن جىلدىڭ قاراشا ايىندا وليمپيادا چەمپيونى مو فاراح العاشقى جاھاندىق ەلشى بولعان ەدى.
ىزگى نيەت ەلشىلەرى كوشى-قون مۇمكىندىكتەرىنە قولداۋ كورسەتىپ، الەم بويىنشا تالانتتاردىڭ تانىلۋىنا ىقپال ەتەدى. توعىز ەلشى قاتارىندا سەگىز جەكە تۇلعا جانە ءبىر فۋتبول كلۋبى بار.
«مەن بۇل تانىمال تۇلعالاردى ح ك ۇ- نىڭ جاڭا ايماقتىق جانە ۇلتتىق ىزگى نيەت ەلشىلەرى رەتىندە قارسى العانىما وتە قۋانىشتىمىن. ولار دۇنيە ءجۇزى بويىنشا شابىت سىيلاۋشىلار. ولارمەن كۇش-جىگەرىمىزدى بىرىكتىرە وتىرىپ، وزگەرىس جاسايتىنىمىزعا سەنەمىن»، - دەدى ح ك ۇ باس ديرەكتورى ەمي پوپ.
«ح ك ۇ ىزگى نيەتتى ەلشىسى رەتىندە مەن ميگرانتتاردىڭ قۇقىعىن قورعايتىنىمدى ماقتان تۇتامىن. ءار ادامنىڭ قۇقىعى قورعالعان جانە مۇمكىندىكتەرگە اشىق الەم ءۇشىن بىرىگەيىك»، - دەدى ءانشى ديماش قۇدايبەرگەن.
ىزگى نيەت ەلشىلەرىن ءوز ەلدەرىندەگى ح ك ۇ وكىلدەرى رەسمي تۇردە تاعايىندادى جانە ولاردى مۇقيات باعالاۋدان كەيىن تاڭدادى.
«وتباسىلىق تاجىريبەمنەن ايتا الامىن، كوشى-قون دۇرىس جۇرگىزىلسە، پايداسى كوپ. ح ك ۇ ىزگى نيەتتى ەلشىسى رەتىندە مەن مادەني مۇرام مەن سپورتتىق تاجىريبەمدى اقپاراتتاندىرۋدى جوعارىلاتۋ ءۇشىن پايدالانعىم كەلەدى»، - دەدى تانىمال فۋتبولشى مۋكتار دياكابي.
ديماش قۇدايبەرگەنمەن بىرگە ح ك ۇ ىزگى نيەت ەلشىلەرى قاتارىندا گانالىق اكتريسا جانە تەلەجۇرگىزۋشى اما ك. ابەرەز، ارگەنتينا/ارۋبادان فوتوگراف نيكولاس مارين بەنيتەس، ماۆريكيي فوتوگرافى پول چوي، گۆينەيالىق فۋتبولشى مۋكتار دياكابي، گانادان كەلگەن مۋزىكانت جانە ءان جازۋشى كوفي كينااتا، بوسنيالىق باسكەتبولشى دجانان مۇسا، البانيا پسيحولوگى، جۋرناليست ءارى جازۋشى ميرەلا سۋلا، سونداي-اق ۋرۋگۆايلىق اتلەتيكو پەنيارول فۋتبول كلۋبى بار.
1951-جىلى نەگىزى قالانعان ح ك ۇ - كوشى- قون سالاسىنداعى جەتەكشى ۇكىمەتارالىق ۇيىم. ح ك ۇ ب ۇ ۇ جۇيەسىنە 2016-جىلى باۋىرلاس ۇيىم رەتىندە قوسىلدى.
اۆتور
ەركەجان سماعۇلوۆا
